Almatyda onkologııamen aýyratyn naýqastar sany ósken
ALMATY. QazAqparat - Almaty onkologııalyq ortalyǵynda emdelýshiler sany jyl saıyn artyp keledi. Bul týraly Almaty onkologııalyq ortalyǵynyń dırektory Nursultan Іzmaǵambetov aıtty, dep habarlaıdy QazAqparat tilshisi.
Spıkerdiń sózinshe bıylǵy jyldyń birinshi jartyjyldyǵynda Almaty onkologııalyq ortalyǵynda 10,5 myń naýqas em alǵan, ótken jyly 6 aıda 9,5 myń naýqas boldy. Mundaı kórsetkish 2016 jyldyń sońynda tirkelse, búginde 6 aıdyń ishinde jetip otyr.
«Qazirdiń ózinde qalalyq onkologııalyq ortalyqtyń hırýrgııalyq bólimshelerinde 1500-den astam hırýrgııalyq ota jasaldy. Olardyń kópshiligi ońaltý ýaqytyn qysqartýǵa jáne laparoskopııany qoldanatyn biregeı joǵary tehnologııalyq zamanaýı gınekologııalyq, mammologııalyq, keýde qýysyna jasalatyn, abdomınaldy, ýrogenıtaldy otalar. Olardy shaǵyn ınvazıvti tehnologııalar dese bolady, buryn mundaı otalardy jasatý úshin bizdiń azamattar shetelge baratyn. Almaty onkologııalyq ortalyǵy Qazaqstandaǵy ashyq jáne laparoskopııalyq ota jasaıtyn klınıkalardyń biri. Bul úshin ortalyqta barlyq qajetti medıtsınalyq qural-jabdyq bar», – deıdi dáriger.
Nursultan Іzmaǵambetovtyń aıtýynsha, Almaty onkologııalyq ortalyǵy qaterli isigi bar naýqastarǵa mamandandyrylǵan medıtsınalyq kómekter, atap aıtqanda, joǵary tehnologııalyq medıtsınalyq qyzmetter (hırýrgııalyq emdeý, isikke qarsy preparattarmen emdeý, sáýlelik jáne ımmýndyq terapııa, psıhologııalyq jáne áleýmettik kómek) kórsetiledi.
«Almaty onkologııalyq ortalyǵynda 9 myńǵa jýyq naýqas hımıoterapııalyq em aldy, radıologııa bóliminde 10 myńnan astam sáýlelik terapııa seansy júrgizildi. Ortalyqtyń ambýlatorlyq hımıoterapııa kabınetinde 5 myńǵa jýyq naýqas ambýlatorlyq em aldy. Qaterli isikke kúdikti naýqastar men onkologııalyq naýqastar úshin 300 myńnan astam KT, MRT, endoskopııalyq jáne tsıtologııalyq zertteýler, ýltradybystyq, IGH jáne t.b. dıagnostıkalyq zertteý júrgizildi», - dedi Nursultan Іzmaǵambetov.
Ol elimizde tegin skrınıngtik tekserýler júrgiziletinin, sondaı-aq, ýaqytyly profılaktıkalyq tekserýden ótip turý kerek ekenin eske saldy.
«Sebebi, qaterli isik neǵurlym erte anyqtalsa, tolyq emdelý múmkindigi soǵurlym joǵary bolady», - dedi ol.
