Almatyda onkologııalyq aýrýlarǵa shaldyqqan balalarǵa arnalǵan pansıonat salynady
ALMATY. QazAqparat - Almatyda bıyl Pedıatrııa jáne balalar hırýrgııasy ǵylymı ortalyǵy bazasynda onkologııalyq aýrýlarǵa shaldyqqan balalarǵa jáne olardyń ata-analaryna arnalǵan pansıonat qurylysy bastalady. Bul joba bıznestiń áleýmettik jaýapkershiligi aıasynda júzege asyrylady.
Almaty ákimdigi men «U-Partners» JShS aralyǵynda yntymaqtastyq týraly memorandýmǵa qol qoıa otyryp, qala basshysy Baýyrjan Baıbek, mundaı bastamalar turǵyndardyń bızneske degen senimin arttyra túsetindigin atap ótti.
«Aýmaǵy 3 myń sharshy metrdi quraıtyn nysan, salynyp bitken soń, memleket menshigine beriledi. Mundaı ortalyqty jeke qarajatqa salý degen - biregeı qubylys. Búginde memleketimiz kásipkerlerge jan-jaqty qoldaý kórsetip keledi. Buǵan jaýap retinde bıznestiń osyndaı belsendi áleýmettik saıasat júrgizip jatqandyǵy kóńil qýantady», - dedi ákim.
Al, «U-Partners» kompanııasynyń bas dırektory Janat Rahmanı óz sózinde onkologııalyq aýrýlarǵa shaldyqqan balalardyń el óńirlerinen Almatyǵa tekserilýge kelgende, keıde ýaqytsha turýǵa baspana tappaıtyndaryn, sondyqtan osyndaı yńǵaıly pansıonat salý uıǵarylǵandyǵyn atap ótti.
Jospar boıynsha joba aldaǵy 14 aıdyń ishinde júzege asyrylady.
Aıta ketelik, qazirgi tańda Almatyda memlekettik-jeke menshik seriktestik jáne bıznestiń áleýmettik jaýapkershiligi aıasynda tórt orta mektep, bir emhana, sondaı-aq, bala baqshalar, sport keshenderi jáne basqa da nysandar salynyp jatyr.
