Almatyda onkologııalyq aýrýlardan bolatyn ólim-jitim deńgeıi tómendedi
ALMATY. QazAqparat- Almatyda onkologııalyq aýrýlardan bolatyn ólim-jitim deńgeıi 10%-ǵa deıin tómendedi, dep habarlaıdy QazAqparat tilshisi.
Onkologııalyq ortalyqtyń bas dárigeri Nursultan Іzbaǵambetovtiń aıtýynsha, 2021 jyldyń 9 aıynyń qorytyndysy boıynsha megapolıste ólim-jitim 10%-ǵa deıin tómendedi.
«Almatyda onkologııalyq aýrýlar erte kezeńde jıi anyqtala bastady. Qaterli jańa óskinderdi, sonyń ishinde, Kovıd-19 ınfektsııasy bar patsıentterdi KT-ǵa jiberý esebinen erte bastan dıagnostıkalaý ulǵaıdy. Ólimniń tómendeýi Almaty qalasyndaǵy onkologııalyq aýrýmen aýratyndardy emdeýdi tolyǵymen qamtýǵa baılanysty. Jyl basynan beri Ortalyqta 13 myń patsıent emdelip shyqty, bul degenimiz, ótken jylmen salystyrǵanda 3 myńǵa deıin joǵarylaý»,- deıdi dáriger.
Bıyl onkologııalyq aýrýǵa shaldyqqan 3317 patsıent esepke alyndy.
Statıstıkalyq derekter boıynsha Almaty qalasynda syrqattanýshylyq qurylymynda birinshi orynda sút bezi obyry, ekinshi orynda kolorektaldy obyr, úshinshi orynda ókpe obyry, tórtinshi orynda- asqazannyń qaterli isigi, besinshi orynda analyq bezdiń qaterli isigi tur.
« 30 qaterli isiginiń 5 nozologııasy 55 paıyzy, ıaǵnı jartysy ólimge ákep soǵady. Ony tómendetý úshin, barlyq dıagnostıkalyq jáne emdeý sharalaryn megapolısimizde qaterli óskinderden oryn alatyn ólim-saldary reıtıngi basynda turǵan 5 nozologııany emdeýge belsendi túrde baǵyttaýymyz qajet», - dedi Nursultan Іzbaǵambetov.
Sonymen qatar, ol ortalyqqa naýqastar elimizdiń barlyq aımaǵynan keletinin tilge tıek etti.
«Búgingi kúni elimizdiń basqa aımaqtarynan kelgen 560 onklogııalyq aýrýmen aýyratyndar qaıta tirkeldi, bul degenimiz, ótken jylmen qaraǵanda eki esege óskendigin kórsetedi. Olardyń arasynda, ókinishke oraı ár 5-patsıent asqynǵan qaterli isikpen medıtsınalyq kómekke júgingen»,- deıdi dáriger.
Maman halyqty skrınıngtik tekserýden ótýge shaqyrady.
«Almaty qalasynyń turǵyndaryn bekitilgen qala emhanalary boıynsha tegin skrınıngten ótýge shaqyramyz. Skrınıngten ótý - bul sımptomsyz qaterli isik aýrýyn erte kezeńde anyqtaýdyń tıimdi ádisi. Óıtkeni naýqasqa em neǵurlym erte taǵaıyndalsa, tolyq saýyǵý múmkindigi soǵurlym joǵary bolady», - dep atap ótti Nursultan Іzbaǵambetov.
