Almatyda onkologııaǵa qatysty eń úzdik jýrnalıstik jumystarǵa baıqaý jarııalandy
ALMATY. 22 aqpan. QazAqparat /Názıra Eleýhan/ - Búgin Almatyda onkologııaǵa salasyna qatysty «Ómir súrý quqyǵy» atty eń úzdik jýrnalıstik jumystarǵa baıqaý jarııalandy. Bul týraly búgin Almatyda ótken arnaıy baspasóz máslıhatynda habarlandy.
Baıqaýdy uıymdastyrýshylar - QR Densaýlyq mınıstrliginiń Qazaq onkologııa jáne radıologııa ǵylymı-zertteý ınstıtýty men shveıtsarııalyq Hoffmann -Lıa ROSh farmatsevtıkalyq kompanııasynyń Qazaqstandaǵy ókildigi.
Atalmysh sharany uıymdastyrýshylar áleýmettik joba onkologııa salasyndaǵy shynaıy jáne beıkommertsııalyq aqparatqa múmkindik ashyp, búkil qoǵamnyń ıgiligine qyzmet etetinine úmit artady.
Baıqaý syılyǵyna úsh atalym bekitildi: «Basylym betindegi eń úzdik materıal úshin», «Úzdik televızııalyq materıal úshin», «Radıoefırdegi nemese Internet basylymyndaǵy úzdik materıal úshin». Bas júldege - 150 myń teńge, ekinshi orynǵa - 75 myń teńge, al úshinshi orynǵa - 30 myń teńge taǵaıyndaldy. Júldege ilikpegen qatysýshylar baǵaly syılyqtarmen marapattalatyn bolady. Komıssııa jarııalanǵan materıaldardy 2010 jyldyń 1 qańtarynan, 2011 jyldyń 31 jeltoqsanyna deıin qaraıtyn bolady. Syılyqtyń laýreattaryna dıplomdar 2012 jyldyń 31 naýryzynda beriledi. Qoıylatyn basty talaptar - ózektilik, buryn-sońdy kóp kóterilmegen tyń, ári sony aqparattarǵa ıe taqyryptar bolýy shart.
«Baıqaýdyń negizgi mindeti - onkologııa salasyndaǵy máselelerdi kóterý, qalyp qoıǵan problemalardy anyqtaý, kemshin tustaryn, jetken jetistikterdi aıtý, pikirler bildirý bolyp tabylady. Joba jeke densaýlyq, balalar densaýlyǵy, onkologııalyq aýrýlardy erte anyqtaý, qaterli isik aýrýyna shaldyqqan naýqastardyń ómir súrýi deńgeıin kóterý, ult densaýlyǵyn jaqsartý syndy áleýmettik-medıtsınalyq qundylyqtarǵa baǵyttalǵan», - dedi baıqaýdyń komıssııa tóraǵasy, Qazaq onkologııa jáne radıologııa ǵylymı-zertteý ınstıtýtynyń dırektory Jetkergen Arzyqulov.
«Búgingi kúni onkologııa salasyndaǵy ǵylymı-tanymaldy jáne aǵartýshylyq aqparatqa degen suranys kóp. Osyǵan oraı, el halqyna, medıtsına qyzmetkerleri men zertteýshilerge laıyqty aqparattyq qyzmet kórsetý suranysy týyndaıdy. Qazirgi ýaqytta jurtshylyqtyń, qoǵamnyń osy bir óte mańyzdy taqyrypty durys túsinip, qabyldaýynda baspa, radıo, televıdenıe jáne Ǵalamtor basylymdaryndaǵy jýrnalısterdiń qosar úlesi zor», - dedi QR jýrnalıster akademııasynyń prezıdenti Saǵymbaı Qozybaev.
Salaýatty ómir saltyn qalyptastyrý Ulttyq ortalyǵynyń bas dırektory Sáýle Dıqanbaevanyń aıtýynsha, adamdardyń ómir saltyn ózgertý, aldyn-alý jáne skrınıng strategııalaryn jetildirý sııaqty sharalar qaterli isik aýrýlarynyń 40 paıyzǵa deıin aldyn alýǵa múmkindik beredi. «Elbasy salaýatty ómir saltyn ustaný qajet ekendigin ár Joldaýynda aıtady. Buǵan halyq basa nazar aýdarý qajet. Búgingi tańda memleket, ınstıtýt tarapynan onkologııalyq aýrýlarǵa baılanysty kóp jumystar jasalýda, arnaıy baǵdarlamalar da bar. Osy syndy baǵdarlama AQSh-ta 20 jyldan beri jumys istep keledi. Sonyń nátıjesinde ol elde onkologııalyq aýrýlardyń kórsetkishi 40 paıyzǵa tómendedi. Jýrnalıster qaýymy osy jumystardy da nazardan tys qaldyrmasa eken», - dedi ol.
