Almatyda Onkologııa ortalyǵynda ashyq esik kúni ótedi

ALMATY. QazAqparat– Almaty qalasyndaǵy Onkologııa ortalyǵynda ashyq esik kúni ótedi. Bul shara Dúnıejúzilik melanoma jáne teri qaterli isigine qarsy kúres kúni aıasynda uıymdastyrylyp otyr, dep habarlaıdy QazAqparat tilshisi.

Almaty qalalyq Qoǵamdyq densaýlyq saqtaý basqarmasynan málim etkendeı, 26 mamyr –Dúnıejúzilik melanoma jáne teri qaterli isigine qarsy kúres kúni. Osyǵan baılanysty erteń saǵat 09.00 - 13.00 aralyǵynda Almaty onkologııalyq ortalyǵynda teri obyryn erte anyqtaý maqsatynda ashyq esik kúni ótedi.

Ortalyq málimetinshe, búgingi kúni 3,5 myńǵa jýyq adam teri qaterli isigi dıagnozymen Almaty onkologııalyq ortalyǵynda esepte tur. Megapolıste jyl saıyn 1 myńǵa jýyq jańa jaǵdaı anyqtalady.

Onkolog Erlan Ásetillanyń aıtýynsha, qaterli isiktiń bul túri tez jáne agressıvti damýymen erekshelenedi.

Sonymen qatar ol teri obyry bastapqy kezeńinde isiktiń paıda bolýy nemese bar meńniń túsi, ólshemi men pishininiń ózgerýi sııaqty belgilerinen kórinetinin atap ótti.

«Eger adamnyń betinde jáne denesinde jańa nevýs paıda bolsa nemese bar meńderiniń túsi, pishini ózgerip, ulǵaıa bastasa, dárigerge júginýi kerek», - dedi onkolog.