Almatyda óner súıer qaýym tanymal mýzykant Bolat Syzdyqovty aqtyq saparǵa shyǵaryp saldy
ALMATY. QazAqparat- Búgin Almatyda óner súıer qaýym belgili qazaqstandyq gıtarıst, kompozıtor «Mızıkola» dýetiniń negizin qalaýshy Bolat Syzdyqovty aqtyq saparǵa shyǵaryp saldy.
Jambyl atyndaǵy Qazaq memlekettik fılarmonııasynda ótken qaraly jıynǵa Bolat Syzdyqovtyń dostary men áriptesteri, estrada ánshileri, Almaty qalasynyń ákimi Baýyrjan Baıbek jáne basqa da zııaly qaýym ókilderi kelip, marqumnyń otbasyna qaıǵyryp kóńil aıtty.
«Men Bolatty óte jaqsy kóretinmin. Ol jany jaısań, aqkóńil, biraq shyndyqty súıetin tik minezdi jan bolatyn. Kim biledi, múmkin osy da onyń aramyzdan erte ketýine sebep bolǵan shyǵar. Ol sońǵy kezderi shyǵarmashylyq jaǵynan ózine kóńili tolmaı júrdi. Qazaq estradasynyń qazirgi jaǵdaıyn qatty ýaıymdaıtyn. Al bul, naǵyz mýzykanttarǵa tán qasıet! Ol tamasha mýzykant bolatyn. Keńes zamany kezinde odaqqa tanymal estradalyq orkestrlerde óner kórsetti. Keıin, «Mıýzıkola» dýetin qurdy. Bul Bolattyń qazaq estradasyna sińirgen úlken úlesi dep bilem», - dedi óz sózinde KSRO halyq artısi Álibek Dinishev.
Óz kezeginde ánshi, aktrısa Karına Abdýllına Almaty ákimdigine, búgingi jınalǵan jurtshylyqqa Bolat Syzdyqovty sońǵy saparǵa shyǵaryp salýǵa kelip turǵandary úshin rızashylyǵyn bildirdi.
«Qazaqstannyń estrada óneri aýyr qazaǵa dýshar boldy. Óıtkeni, Bolat keremet mýzykant bolatyn. Gıtarany 12 jasynda qolyna alǵan ol, sol gıtarasyn óle-ólgenshe qolynan tastamady. Ol bizge úlken shyǵarmashylyq mura qaldyrdy. Biz endi ony urpaqtarǵa saqtaıtyn bolamyz. Ol men úshin eń jaqyn dosym boldy. Bolattyń jalǵyz júrgenin kórse, dos-jarandar: «Karına qaıda?», - dep suraıtyn bolsa, meni kórse: «Bolat qaıda? Ne istep júr?», - dep suraıtyn. Eger Bolat bolmasa, Qazaqstannyń estradasynda Karına Abdýllına da bolmas edi. Dostar, ádette naǵyz artısti, tamasha mýzykantty qol shapalaqtap shyǵaryp salady. Sizderdi de Bolatty aqtyq saparǵa qol shapalaqtap shyǵaryp salýlaryńyzdy suraımyn», - dedi Karına Abdýllına.
Osydan keıin búgingi azaly jıynǵa kelgen azamattar oryndarynan tik turyp, uzaq ýaqyt qol shapalaqtady.
Aıta ketelik, búgin 13:00-de «Rıtts-Palas» meıramhanasynda Bolat Syzdyqovtyń rýhyna baǵyshtalyp as beriledi.
