Almatyda «Óner - ómir órnegi» shyǵarmashylyq stýdııasynyń balalardy qoldaýǵa arnalǵan sharalary ótip jatyr
ALMATY. 3 shilde. QazAqparat - Búgin Almatydaǵy «Bóbek» ulttyq ǵylymı-tájirıbelik, bilim berý jáne saýyqtyrý ortalyǵynda «Óner - ómir órnegi» beıneleý óneri shyǵarmashylyq stýdııasynyń balalardy áleýmettik qoldaýǵa baǵyttalǵan is-sharalary bastaldy.
«Bóbek» balalar qaıyrymdylyq qorynyń 20-jyldyǵyna arnalǵan bul sharaǵa az qamtamasyz etilgen otbasynan shyqqan daryndy balalar qatysýda. Onda azamattyq, adamgershilik qundylyq turǵysynan óziniń dara adamı tulǵasyn sezine otyryp, ózin-ózi damytýyna, jetildirýine jaǵdaı týǵyzý, ádebı shyǵarmashylyqqa belsendi qatystyra otyryp tulǵanyń úılesimdi qalyptasýyna yqpal etý jáne oǵan jalpy jurtshylyqtyń nazaryn aýdartý maqsat tutylyp otyr. 8 shildege deıin sozylatyn stýdııa jumysyna respýblıkanyń túkpir-túkpirinen az qamtylǵan otbasynan shyqqan 10-15 jastaǵy beıneleý óneri boıynsha qabiletti, daryndy balalar men jasóspirimder qatysýda. Baǵdarlamada kórkem shyǵarmashylyq jumystaryna tartý úshin sheberlik synyptaryna qatysý arqyly tanymal sýretshilerdiń shyǵarmashylyǵymen tanysý, beıneleý óneri salasynda júrgen sheberlermen kezdesýler ótkizý, shyǵarmashylyq kórmelerdi aralaý kózdelgen. Onda túrli baıqaýlar, qyzyqty saıahattar, kóńildi baǵdarlamalar uıymdastyrylyp, stýdııa jumysynyń qorytyndysy boıynsha shyǵarmashylyq jumystardyń kórmesi ótkizilip, ár qatysýshyǵa arnaıy sertıfıkat tapsyrylady dep josparlanýda.
