Almatyda óner murajaıyna ulttyq kıim kıip kelgen adam ondaǵy sharalarǵa tegin kiredi
ALMATY. QazAqparat - Almatyda 22-27 naýryz aralyǵynda Á.Qasteev atyndaǵy óner murajaıynda bir apta boıy «Murajaıdaǵy Naýryz» festıvali ótkiziledi.
Merekelik aptanyń árbir kúni kelýshiler úshin ınteraktıvtik, tanymdyq jáne oıyn-saýyq sharalary uıymdastyrylady.
Óner murajaıy baspasóz qyzmetiniń habarlaýynsha, kún saıyn ulttyq kıim kıip kelgen adam murajaıǵa tegin kiredi.
Al murajaıda ár kúni saǵat 11.00-den 17.00-ge deıin «Shaı álemi» sharasy ótkiziledi. Kelýshiler qysh sháınekterge órnek salýdan ótkiziletin sheberlik sabaǵyna qatysyp, shaıdan dám tata alady.
Sondaı-aq, kún saıyn murajaıdyń májilis zalynda halyqtyq-qoldanbaly óner men kıim tarıhy jóninde dáris oqylady, al zaldarda birqatar taqyryptyq jáne ınteraktıvtik kórmeler ashylady.
«Bulardan basqa, aptanyń árbir kúni arnaıy baǵdarlama júzege asyrylady:
22 naýryz - «Kóktemgi kún men túnniń teńelgen kúni». Saǵat 16.00-de
Dızaıner Hafız Hannyń «Áıel kóılegi. Azııanyń 12 tarıhy» atty
mońǵol dáýirine deıingi kóılekter kórmesi ashylady.
23 naýryz - «Kıiz basý kúni». Tústen keıin murajaıǵa kelgender kıiz basýǵa atsalysady. Halyq sheberleri tekemet basady.
24 naýryz - «Dala sazdary kúni». Saǵat 16.00-de - Raýshan Bazarǵalıevanyń jeke kórmesi ashylady. Kórmede túrli sándik-qoldanbaly óner tehnıkasynda oryndalǵan avtorlyq týyndylary - gobelen, kıiz panno, batık, shı kórsetiledi.
25 naýryz - «Kınematografııa kúni». Saǵat 11.00-den 17.00-ge deıin - murajaıdyń májilis zalynda kınematografııa jaýharlary - avtorlyq vıdeo-art, óner jaıly qysqametrajdy fılmder, tipti art-haýs stılindegi kınolar kórsetiledi.
26 naýryz «Kvest kúni» (kompıýterlik oıyn túri). Saǵat 17.00 - esten ketpes kvest bolady. Onyń árbir qatysýshyna tosynsyılar beriledi. Oıynǵa qatysý úshin mindetti túrde aldyn-ala tirkelý qajet. Qatysý aqyly.
Al sol kúni keshke murajaıǵa kelýshiler úshin túrli shyǵarmashylyq ujymdardyń kontserttik baǵdarlamasy men «Aqqý» by Lumiere» biregeı sáýleli saýyq-dýmanynyń premerasy bolady», - delingen habarlamada.
Aıta ketelik, festıvaldiń seriktesteri: T. Q. Júrgenov atyndaǵy QazUÓA, Almaty volonterlar qaýymdastyǵy, «Kazakhstan Fashion Week», «Chaıkofskıı» JShS, «Lumiere», «Fokus» shyǵarmashylyq ujymy.
