Almatyda «Ońaı» júıesiniń isten shyǵý sebepteri anyqtaldy
ALMATY. QazAqparat - «Almaty kólik holdıngi» senbi kúni tańerteń keıbir avtobýstarda «Ońaı» tólem júıesiniń isten shyǵýyna ne sebep bolǵanyn anyqtady, dep habarlaıdy «QazAqparat» HAA tilshisi.
11 qarasha kúni tańerteń Almaty qalalyq avtobýstarynyń jolaýshylary «Ońaı» termınaldarynyń isten shyqqanyn, al júrgizýshiler 80 teńge jolaqyny qolma-qol tóleýdi talap etip jatqanyn aıtyp shaǵymdandy. «Júıeniń ýaqytsha isten shyǵýyna josparǵa saı, júıe modýlderiniń birin jańartý sebep boldy. Júıege engizilgen jańa modýldegi qateliktiń saldarynan kútpegen jaǵdaı boldy. Aqaý «Ońaı» kólik termınaldarynyń bir bóligin - «bir rettik tólem» termınaldaryn isten shyǵardy. Protsessıng ortalyǵynyń shtattyq jumysy 15:00-de qalpyna keltirildi. Sonymen qatar kólik termınaldarynyń keıbireýlerine jeke-jeke «qaıta júkteý» komandasyn berý qajet. Ol 12 saǵattyń ishinde aıaqtalady», - deıdi «Almaty kólik holdınginiń» baspasóz hatshysy Altaı Sandybaev.
Eske sala keteıik, 65 jáne 26 baǵyttarynyń avtobýstaryndaǵy «Ońaı» termınaldary tólemdi qabyldamaı qoıǵan.
