Almatyda Ómirbek Joldasbekovtiń 90 jyldyǵyna arnalǵan sımpozıým ótip jatyr
Naýryzdyń 1-5 aralyǵynda ótetin sımpozıýmdy BǴM ǴK akademık Ó.A.Joldasbekov atyndaǵy Mehanıka jáne mashınataný ınstıtýty jáne Qazaqstan Respýblıkasynyń Ulttyq ınjenerlik akademııasy, ál-Farabı atyndaǵy QazUÝ, Q.Sátpaev atyndaǵy QazUTÝ jáne «NAZ» JShS qoldaýymen uıymdastyryp otyr.
Sımpozıýmnyń ashylý saltanatynda Ómirbek Joldasbekov týraly baıandama jasalyp, kózi kórgender estelik aıtty.
«Ómirbek Arsylanuly - ol naǵyz tulǵa. Ol mektepti altyn medalmen bitirgen. Odan keıin M.V.Lomonosov atyndaǵy ýnıversıtetin qyzyl dıplomen támamdady. Eńbek jolyn týǵan jeri Shymkentte bastady. Ol kisini stýdentter óte jaqsy kórdi. Óte qarapaıym boldy. 1962 jyly 31 jasynda ǵylym kandıdaty boldy.1973 jyly 42 jasynda ǵylym doktory boldy. Ol kezde ǵylymı ataqqa ıe bolý óte qıyn bolatyn. Talap kúshti edi. Ol bar ǵumyryn QazUÝ-ne arnaǵan jan»,- deıdi Ulttyq ǵylym akademııasynyń prezıdenti Murat Jurynov.
Óz kezeginde memleket jáne qoǵam qaıratkeri Baqytjan Jumaǵulov akademık Ómirbek Joldasbekov tárbıelegen shákirtteri búginde elimizdiń damýyna úles qosyp júrgenin atap ótti.
«Eń aldymen Ómirbek Joldasbekov myqty shákirtter tárbıeledi. Ár salany damytý úshin kúsh saldy. Osy kisiniń kóregendiginiń arqasynda JOO ǵylymı jumystarmen aınalysýǵa múmkindik týdy. ıAǵnı, ol ǵylymı mektep qalyptastyrdy. 25 doktor, 100 kandıdat daıyndady»,- dedi Baqytjan Jumaǵulov.
Aıta keteıik, sımpozıýmda AQSh, Reseı, Frantsııa, Japonııa, Túrkııa, Iran, Irak, Polsha jáne taǵy basqa 15 elden kelgen ǵalymdardyń qatysýymen 120-dan astam ǵylymı baıandama jasalmaq.
Buǵan deıin ýnıversıtet rektory Janseıit Túımebaev bastaǵan joǵary oqý ornynyń basshylyǵy, ǵylymı qoǵam ókilderi, Ómirbek Joldasbekovtiń otbasy músheleri, kezinde birge jumys istegen áriptesteri, dos-jarandary, shákirtteri jáne stýdentter akademıkti eske alyp, rýhyna taǵyzym etip eskertkishine gúl shoǵyn qoıdy.
