Almatyda Oljas Súleımenovtiń 75 jyldyǵyna arnalǵan ádebı kesh ótti

Keshke Oljas Súleımenovtiń ózi qatysty. Keshtiń ashylý saltanatynda oqý ornynyń basshysy men ustazdar jáne stýdentter qaýymy mereıtoı ıesin kele jatqan týǵan kúnimen quttyqtap, uzaq ómir, mol shyǵarmashylyq tabystar tiledi.

Shara Oljas Súleımenov atyndaǵy áleýmettik-gýmanıtarlyq oqý jáne tárbıe ınstıtýtynyń orys tili kafedrasynyń uıymdastyrýymen ótkizildi. Qazaqstanǵa ǵana emes, shetelderge, bir sózben aıtqanda búkil álemge áıgili tulǵa jaıyndaǵy teatrlandyrylǵan kórinisterge onyń shyǵarmalarynyń altyn arqaýy negiz etip alynǵan. Aqyn ómiri men shyǵarmashylyǵynan syr shertetin bul qoıylym ýnıversıtet stýdentteriniń kúshimen daıyndaldy. Qoıylym barysynda muraǵat sýretteri men derekti fılmnen kadrler de kórsetildi. Kópshilik nazaryna usynylǵan qoıylym kórermenniń ǵana emes, Oljas Súleımenovtiń kóńilinen de shyqty. Kózine jas alǵan mereıtoı ıesi: «Meniń kóz aldymnan barlyq ómirim tizbektelip ótkendeı boldy. Keremet qoıylym. Búgin ǵana 75-ke kelgenimdi sezinip otyrmyn. Úlken qýanysh pen keremet kún syılaǵandaryńyzǵa alǵys aıtamyn!», - dedi.

Keshte sonymen birge memleket jáne qoǵam qaıratkeriniń shyǵarmashylyǵyna jan-jaqty taldaý jasalynyp, óleńderi oqyldy.

«Biz aqynmen jyl saıyn ár túrli taqyrypta kezdesýler uıymdastyryp turamyz. Bıyl Oljas Súleımenovtiń stýdenttermen 5-shi kezdesýi. Sharaǵa aqynnyń ózi keldi, munyń ózin mereıtoı ıesiniń agrarlyq ýnıversıtet pen stýdentterine degen qurmeti men iltıpaty dep túsinemiz», - dep atap ótti Qazaq ulttyq agrarlyq ýnıversıtetiniń rektory Tilektes Espolov.

Onyń aıtýynsha, aqynnyń mereıtoıy aıasynda QazUAÝ-de dóńgelek ústelder, ardagerler arasynda voleıboldan halyqaralyq jarystar uıymdastyrylǵan. «Aıta keterligim, Oljas Súleımenov osy ardagerler komandasynyń kapıtany bolyp tabylady», - dedi oqý ornynyń basshysy.

Rektor shara barysynda Oljas Súleımenov atymen atalatyn áleýmettik-gýmanıtarlyq oqý jáne tárbıe ınstıtýtynyń jumys barysymen tanystyrdy. «Mundaǵy barlyq kafedralar búgingi ýaqyttyń talabyna saı zamanaýı mamandardy qalyptastyrý boıynsha úlken tárbıelik jumystaryn júrgizýde. Instıtýtta 7 ǵylym doktory men professorlar, 20-dan astam ǵylym kandıdattary qyzmet jasaıdy. Olar 9 jastar ortalyǵyn basqarady. Jyldan jylǵa bul ortalyqtardyń sany artyp keledi. Instıtýt «HH ǵasyr adamy» atymen atalǵandyqtan ol bizge kóp mindetterdi júkteıdi. Jyl saıyn bizdiń ordamyzda «Oljas oqýlary» ótip turady. Onda stýdentter bes tilde - qazaq, orys, aǵylshyn, nemis jáne frantsýz tilderinde Oljas Súleımenovtiń óleńderi men shyǵarmashylyǵynan úzindiler oqıdy», - dedi ol.