Almatyda olımpıadalyq sport mektepterine balalardy irikteý bastaldy
ALMATY. QazAqparat - Almaty qalasynyń sport basqarmasyna qarasty balalar men jasóspirimder olımpıadalyq rezervtegi tegin sport mektepterine jyl saıynǵy irikteý bastaldy, dep habarlaıdy QazAqparat.
Almaty ákimdiginiń baspasóz qyzmeti habarlaǵandaı, tegin sport mektepterine irikteý dástúrli túrde shilde-qyrkúıek aılarynda ótedi. Bul rette balanyń jalpy fızıkalyq daıyndyǵy men jasyna basa mán beriledi.
«Almatyda balalar men jasóspirimder olımpıadalyq rezervtegi 10 sport mektebi jáne 1 múmkindigi shekteýli balalarǵa arnalǵan «Almaty» sport klýby jumys isteıdi. Bul balalar men jasóspirimder arasynda sporttyq daryndylardy anyqtaý jáne damytý maqsatynda ashylǵan mamandandyrylǵan oqý oryndary. Olar balalardyń ózderi tańdaǵan sport túrimen kásibı deńgeıde aınalysýyna jáne Olımpıada oıyndaryna qatysý úshin daıyndalýǵa múmkindik beredi. Búgingi tańda osy mektepterde 13 myńnan astam bala kásibı sportpen aınalysady», - dep habarlady ákimdikte.
Almaty qalasynyń sport basqarmasy sportshylardyń oqý-jattyǵýy men issaparlardyń barlyq shyǵynyn kóteredi.
«Oqýǵa túsý úshin mindetti standarttardy tapsyrý arqyly irikteýden ótý kerek. Negizi bul jalpy dene jattyǵýlary: júgirý, sekirý jáne tartylý. Ár sport túri úshin jeke-jeke arnaıy dene daıyndyǵy tekseriledi: mysaly, kórkem gımnastıka úshin shpagatqa otyra alý kerek. Mindetti sharttardyń biri Almaty qalasynda tirkelý», - delinedi ákimdiktiń habarlamasynda.
