Almatyda «Olımpıada kúnine» arnalǵan qalalyq buqaralyq júgirý ótedi

Bul týraly búgin Almatyda ótken arnaıy baspasóz máslıhatynda QR Ulttyq Olımpıada komıtetiniń vıtse-prezıdenti, jeńil atletıka federatsııasynyń prezıdenti Pavel Novıkov habarlady.

Onyń aıtýynsha, bul kúni dástúrli túrde júgirýden jeke jáne «Anam, ákem jáne men» atty otbasylyq jarystar, sonymen qatar 20-40 jas aralyǵynda 2 400 metr qashyqtyqqa - «Prezıdenttik mıl» júgirýi ótkizilmek. «Jarystarǵa múmkindigi shekteýli sportshylar da qatysatyn bolady. Bul sharaǵa barlyq qala turǵyndary men sport súıer qaýym qatysa alady, sondyqtan bárin densaýlyq pen qýanysh syılaıtyn sporttyq sharaǵa qatysýǵa shaqyramyz», -dedi ol. Onyń aıtýynsha, buqaralyq júgirýge 10 myńnan asa sport súıer qaýym qatysady dep kútilýde.

«Dúnıejúzilik Olımpıada kúni» - Halyqaralyq Olımpıada komıtetiniń sheshimimen 1948 jyldan beri ótkizilip keledi. Sol jyldan bastap buqaralyq sporttyq sharalardy ótkizý Olımpıada qozǵalysynyń dástúrine aınaldy. Alǵashqy aktsııa 1948 jyldyń 23 shilde kúni ótti. 1987 jyldan bul sharaǵa «Olımpıadalyq júgirý kúni» degen ataý berildi.