Almatyda Olımpıada kúni velojarystan bastalady - I. Orazaqov
ALMATY. QazAqparat - Almatyda aldaǵy 23 mamyrda bolatyn Olımpıada kúni velojarystan bastalady. Bul týraly búgin Almatyda ótken baspasóz máslıhatynda «Almaty qalasy halyqaralyq sport jobalary dırektsııasy» memlekettik Qorynyń dırektory Ilıa Orazaqov málimdedi.
«Almatyda Olımpıada kúni keń kólemdi velojarystan bastalady. Qatysýshylar tańǵy saǵat 08:00-de «Suńqar» Halyqaralyq shańǵy tramplınderi kesheni aldyna jınalady. Jarys 08:30-da bastalady. Máre - Ortalyq stadıonnyń aldy. Velojarystan keıin ártúrli sporttyq sharalar jáne merekelik kontsert bolady», - dedi I. Orazaqov. Onyń aıtýynsha, bul kúni Almaty qalasynyń halyqaralyq sport jobalary dırektsııasy Astana, Shymkent jáne Oral qalalarynda da Olımpıada kúnin ótkizbek.
Mysaly, Astanada 800 jáne 1200 metrlik qashyqtyqqa jarys ótedi, sondaı-aq «Olımpıada jarystary» taqyryby boıynsha asfaltqa sýret salýdan baıqaý uıymdastyrylady. Múmkindigi shekteýli jandar da qoǵam nazarynan tys qalmaıdy. Olardyń arasynda da ártúrli sport jarystaryn ótkizý josparlanǵan. Sonymen qatar, Astana qalasy ákiminiń qatysýymen velojarys ótedi. Al Shymkentte gir sporty, asyq atý jáne arqan tartý sekildi oıyndar boıynsha jarystar ótý kózdelse, Oralda strıtbol, golf, qoıan-qoltyq urys, arqan tartý boıynsha jarystar josparlanǵan.
