Almatyda Olımpıada kúni atalyp ótildi
/strong>Mamyrdyń 22-si. QazAqparat /Názıra Eleýhan/ - Búgin Almatyda Astana alańynda áýesqoı júgirýshiler men barsha sporttyq qaýymdastyq dástúr boıynsha Olımpıada kúnin atap ótti. Sharaǵa 8 myńǵa jýyq adam qatysty,
dep habarlaıdy QazAqparat.
Ulttyq olımpıada komıteti, QR Týrızm jáne sport mınıstrligi, Almaty ákimdigi men Jeńil atletıka federatsııasynyń uıymdastyrýymen ótip jatqan sporttyq sharaǵa mektep oqýshylary men stýdentter, qala turǵyndary men barsha áýesqoı júgirýshiler qatysty. Shara baǵdarlamasy boıynsha jasóspirimder, bozbalalar men boıjetkender arasynda 400, 500, 600 jáne 1000 metrlik jekelegen jarystar, prezıdenttik uzaqtyq - 2400 qashyqtyqqa júgirýden, sonymen qatar, 1000 metrge júgirýden «Ákem, anam jáne men» atty otbasylyq jarystar, sondaı-aq 100 metrge júgirýden múmkindigi shekteýli sportshylar arasynda jarystar ótti.
Barlyq qatysýshylarǵa Ulttyq olımpıada komıtetiniń sertıfıkattary men estelik syılyqtar tabystaldy.
Atalmysh sharanyń ashylý saltanatynda Almaty qalasy ákiminiń orynbasary Serik Seıdýmanov barlyq qatysýshylarǵa «qosh keldińizder!» deı otyra, barlyǵyn sportpen jáne dene shynyqtyrýmen shuǵyldanýǵa shaqyrdy. Onyń aıtýynsha, Olımpıada kúnin ótkizý dástúriniń uzaq jyldyq tarıhy bar. «Mundaı sporttyq sharalar álemniń túkpir-túkpirinde atap ótilýde, oǵan jas shamalary men kózqarastary ár túrli mıllıondaǵan adamdar qatysýda. Meniń oıymsha, bul qazirgi zamanǵy Olımpızmniń qaıta órleýi men sport jáne salaýatty ómir saltyn nasıhattaýǵa múmkindik beretin sporttyq mereke», dedi S. Seıdýmanov.
Uıymdastyrýshylardyń aıtýynsha, ótken jylǵy sharaǵa 10 myń adam qatysqan.
