Almatyda «Olımp» býkmekerlik keńsesiniń isi boıynsha sot úkimi shyqty
Atalǵan istiń fıgýranttary (20-dan astam adam – 11 sottalýshy men izdeý jarııalanǵan 9 adam) uıymdasqan qylmystyq topqa qatysqany, zańsyz oıyn bıznesin uıymdastyrǵany, salyq tóleýden jaltarǵany, qylmystyq jolmen alynǵan tabysty zańdastyrǵany (aqshany jylystaý) úshin sotqa usynyldy.
Sot anyqtaǵandaı, atalǵan tulǵalar, izdeýge jarııalanǵandardy (9 adam – red.) qosa alǵanda qylmystyq ekonomıkalyq qyzmet salasyndaǵy quqyqbuzýshylyqtardy jasaý maqsatynda turaqty uıymdasqan top quryp, onyń qyzmetimen aınalysqan.
Toptyń negizgi qylmystyq áreketi: býkmekerlik qyzmet retinde jalǵan jumys istep, zańsyz oıyn bıznesin uıymdastyrý jolymen krımınaldyq tabysty turaqty alyp turý, bıýdjetke salyq tóleýden jaltarý, qylmystyq jolmen kelgen aqsha men ózge múlikti zańdastyrý bolǵan.
Іs fıgýranttary qylmystyq top quramynda bolyp, 2014 jyldyń qańtar aıynan beri kelesi áreketter jasaǵan:
- kompanııa serverleriniń orny QR syrtyna aýystyrylǵan, «Olımp» BK saıtyna elektrondyq kazıno ıntegratsııalanǵan;
- kelip túsken aqsha qolma-qol aýystyrylǵan;
- aqshany sheteldik valıýtaǵa aýystyryp, kýrerler arqyly QR syrtyna shyǵaryp, zańdastyrǵan.
Sottalýshylardyń qylmystyq áreketteri saldarynan memleketke 95 mlrd teńgeden astam materıaldyq shyǵyn keltirildi.
«Sot otyrysy kezinde sottalýshylar óz kinásin moıyndamaı, qylmystyq toptyń bolǵanyn bilmeıtinderin aıtty. Qorǵaý tarapy sottan aıyptalýshylardy aqtaýdy surady. Sot aıyptalýshylardyń kinási is materıaldarymen, sonyń ishinde qupııa júrgizilgen tergep-tekserý amaldarymen dáleldendi degen túıin jasady», - dep málim etti sottyń baspasóz qyzmetinen.
Prokýror aıyptaýdy qoldap, barlyq qatysýshylarǵa bas bostandyǵynan aıyrý túrindegi jazany surady.
Sot jazany taǵaıyndaý kezinde jazany jeńildetetin jaǵdaılardyń baryn jáne aýyrlatanyn jaǵdaılardyń joqtyǵyn esepke ala otyryp jáne árqaısysynyń qylmystyq topqa qatysý dárejesine qaraı 5 jyldan 8,5 jylǵa deıin qamaýǵa alý úkimin shyǵardy. Olar jazany qaýipsizdigi ortasha mekemede óteıdi.
Sottalýshylardyń qylmystyq jolmen tapqan múlki memleket paıdasyna tárkilendi.
Sondaı-aq memleket paıdasyna keltirgen materıaldyq shyǵyn – 95 mlrd teńge óndirilip alyndy.
Sot úkimi zańdy kúshine engen joq.
Eske sala ketsek, 2019 jyldyń jeltoqsan aıynda QR UQK Almaty qalasy boıynsha departamenti prokýratýra organdarymen birlesip «Olımp» býkmekerlik keńsesi ákimshiliginiń zańsyz oıyn bıznesin uıymdastyrý faktisi boıynsha sotqa deıingi tergeý amaldaryn bastady.
2020 jyldyń 22 qańtarynan bastap «Olımp» býkmekerlik kompanııasy Qazaqstanda lıtsenzııasynyń toqtatylýyna baılanysty endi oıyn stavkasyn qabyldaı almaıdy.