Almatyda oqýshynyń telefonyn urlaǵan 33 jastaǵy jigit ustaldy
Almaty qalalyq polıtsııa departamentiniń málimetinshe, kúdikti kóbine áıelder men mektep oqýshylarynyń qaltasyn qaqqan.
«Qoǵamdyq kóliktegi urlyqtyń aldyn alý boıynsha is-shara barysynda bizdiń bólimshe qyzmetkerleri qalalyq krımınaldyq polıtsııadaǵy áriptesteriniń kómegimen qoǵamdyq kólik baǵyttarynyń birinde 33 jastaǵy D. esimdi azamatty ustady. Kúdikti balanyń qaltasynan smartfondy urlap ketken. Mobıldi qurylǵy tárkilenip, oqýshynyń ata-anasyna qaıtaryldy» , – dedi Medeý aýdandyq PB janyndaǵy polıtsııa bóliminiń bastyǵy Edilhan Baıǵaraev.
Qazirgi ýaqytta sotqa deıingi tergeý amaldary júrgizilýde. Kúdikti qamaýǵa alyndy.
Polıtsııa ókiliniń aıtýynsha, Almaty oblysy týmasynyń osyǵan uqsas qylmystarǵa qatysy bar-joǵy anyqtalyp jatyr.
Atalǵan derek boıynsha QR QK-niń 188-babyna sáıkes qylmystyq is sotqa deıingi tergeýdiń biryńǵaı tizilimine tirkeldi.
