Almatyda oqýshynyń telefonyn tartyp alǵan er adam ustaldy
ALMATY. QazAqparat - Almatyda oqýshynyń uıaly telefonyn tartyp alǵan er adam ustaldy, dep habarlaıdy QazAqparat tilshisi qalalyq PD baspasóz qyzmetine silteme jasap.
Kúdikti 35 jastaǵy Mańǵystaý oblysynyń turǵyny bolyp shyqty.
«Bul operatsııany biz krımınaldyq basqarmanyń qatysýymen júzege asyrdyq. Qazir odan suraq-jaýap alynyp jatyr. Kinásin moıyndady. Alǵan telefonyn satyp úlgergen. Qaı jerge satylǵany tekserilip jatyr. Er adamdy tintý kezinde pyshaq tabyldy. Ol is materıaldaryna tirkeldi. Jańa málimetterge baılanysty prokýratýramen birige otyryp qylmystyq isti bótenniń múlkin urlaýdan góri aýyrlaý sanatqa kóshirý josparlanyp otyr», - dedi Almaly aýdandyq PB basshysynyń orynbasary Abzal Turǵanaly.
Polıtsııanyń habarlaýynsha, kúdikti buǵan deıin de qylmystyq jaýapkershilikke tartylǵan.
Qazir onyń basqa da qylmystarǵa qatysy bar-joǵy tekserilip jatyr.
«Er adam sol kúni Abylaı han kóshesi boıyndaǵy dúkenderdiń birinen sadaqa jáshigin urlap ketken. Meshit ımamy joǵalǵan jáshikti tanyp, resmı túrde aryz jazdy», - dedi ol.
Eske sala keteıik, keshe belgisiz er adamnyń avtobýsta oqýshy qyzdyń uıaly telefonyn tartyp alǵany jóninde habarlaǵan edik.
