Almatyda oqýshylarǵa taratylǵan 1 myńnan astam planshet jaramsyz bolyp shyqty

ALMATY. QazAqparat - Almatyda kópbalaly ata-analar qashyqtan oqýǵa tegin taratylǵan planshetterge qatysty shaǵym túsirdi, dep habarlaıdy QazAqparat tilshisi.

Almaty ákimdiginde qurylǵan arnaıy komıssııa saraptamanyń birinshi kezeńin qorytyndylady.

«Ótken aptada kópbalaly analardyń kóp shaǵym keldi. Soǵan baılanysty biz ata-analardyń qolyndaǵy planshetterdiń tehnıkalyq talapqa saı ekendigin anyqtaý úshin arnaıy táýelsiz saraptama taǵaıyndadyq», - dedi qoǵamdyq baqylaý úılestirýshisi Saıda Táýkeleva.

Qalada jalpy quny 1 mlrd 319 myń teńge bolatyn 22 myń planshet taratylǵan. 1 planshet quny 60 myń teńge shamasynda.

«1 119 planshet jaramsyz bop shyqty. Bul buıymdardy jetkizýshige qaıtardyq», - dedi qalalyq Bilim basqarmasy basshysynyń orynbasary Aıdyn Saılaýbaı.

Sarapshylardyń pikirinshe, tehnıkalyq aqaýlar mehanıkalyq áserden bolýy múmkin.

«Zaýyttan bolǵan aqaý bolsa jetkizýshi aýystyryp beredi. Bul tehnıka bolǵandyqtan buzylýy múmkin. Planshet oınaýǵa emes, sabaq oqýǵa beriletinin eskerý kerek», - dedi monıtorıng tobynyń ókili Rafael Gasanov.

Onyń aıtýynsha, planshetterge 3 jyl kepildik beriledi. Almaty oqýshylarynyń 96 paıyzy qashyqtan bilim alýy úshin qajetti quralmen qamtylǵan. Eger planshet mehanıkalyq áserden isten shyqsa, ony aýystyrý zań oıynsha qarastyrylmaq.