Almatyda oqýshylarǵa Shákárimniń murasy tanystyryldy
Búgin Almatyda I.Krylov atyndaǵy qalalyq ortalyq kitaphanasynda belgili qazaq aqyny, fılosof, oıshyl kompozıtor Shákárim Qudaıberdiulynyń 160 jyldyǵyna arnalǵan merekelik is shara ótken bolatyn.
Jıyn «Bir el - bir kitap» jáne jalpyulttyq «Rýhanı jańǵyrý» baǵdarlamasy aıasynda uıymdastyryldy.
Jıyn barysynda mýzyka, óner, ádebıet ókilderi, kitaphanashylar baıandama oqyp, jas kásibı ártisterdiń teatrlandyrylǵan qoıylym qoıdy.
Jastarǵa Shákárimniń sırek kezdesetin tarıhı sýretteri kórsetildi.
«2006 jyldan bastap «Bir el - bir kitap» degen aktsııa bastaldy. Biz sol aktsııany Abaıtanýdan bastadyq. Búgin Shákárimtanýdy is sharamen atap óttik. Ondaǵy maqsatymyz - jastar ótkenin umytpasyn degen tilek. Sol kezdiń ózinde Shákárim polıglot, jan-jaqty ıntellektýal bolǵan. Ár qazaq jigiti Shákárim sekildi bolaıyn, til bileıin dep ózin ózi damytsa degen tilek. Sol úshin belgili akter Bekjan Turysty, ánshi Erkin Shúkimandy shaqyrdyq», - dedi kitaphana meńgerýshisi Darý Qarjaýbaeva.
Fılologııa ǵylymdarynyń kandıdaty, dotsent, «Qazqaıta jańartý» RMK bas dırektory Jandos Áýbákir Shákárim Qudaıberdiulynyń murasy týraly keńinen aıtyp ótti.
«Men ózim Shákárimnen alystaǵan joqpyn. Onyń murasy bolashaqqa azyq. Abaı mýzeıinde júrgende de, Shákárimniń bir qyryn ashýǵa tyrysatynbyz. Qundy derekterdi izdeýmen boldyq. Shákárim orys jazýshysy Tolstoımen hat alysqan aqyn. Ol hattar jete almady. Bul kisiniń jan jaqtylyǵy bala kezinen óner, bilimge beıimdiligi anyq bolǵan. Óz kıimin ózi tigip alatyn bolǵan. Ónertapqyshtyǵy óz aldyna garmon, skrıpka jasaǵan. Shákárim muralary keńestik ıdeologııanyń kesirinen qanshama ýaqyt boıy zerttelmeı qaldy. Onyń murasyn áli de zertteý kerek. Shákárim murasy bolashaqtyń qamy úshin jasalǵan úlken qundy dúnıeler», - dedi Jandos Áýbákir.
Al dástúrli ánshi Erkin Shúkimanov aqynnyń qazaq mýzykasyna qosqan úlesin aıtyp ótti.
«Shákárim tek aqyn ǵana emes aýdarmashy, tarıhshy. Onyń qazaq mádenıetine qosqan úlesi zor. Bala kúninen bastap dombyra, qobyz úırengen. Skrıpka, baıan úırenýge tyrysqan. Orystyń balalaıkasyn úırengen. Shákárimniń artynda jalpy 30 jýyq áni qaldy. Biraq, olardyń barlyǵy túgel jetpedi», - dedi Erkin Shúkiman.
Otyrys sońynda jasóspirimder Shákárimniń murasyn qanshalyqty biletindikterin kórsetti.
