Almatyda oqýshylardyń «Aman keleshek» mádenı-sport festıvali ótti
ALMATY. QazAqparat - Almatyda Qazaqstan Respýblıkasy Tuńǵysh Prezıdenti - Elbasy qorynyń sporttyq-jattyqtyrý kesheninde balalarǵa arnalǵan «Aman keleshek» IV mádenı-sport festıvali ótti dep habarlaıdy QazAqparat tilshisi.
Festıvalǵa Qazaqstannyń túkpir-túkpirinen korrektsııalyq mektep-ınternattar, balalar úıi men orta bilim berý mektepteriniń 3 000-nan astam oqýshy jınaldy.
Qazaqstanda analogy joq, «Aman keleshek» jobasyna jurtshylyq jyly lebizin bildirdi.
- «Aman keleshek» festıvali - jyl saıynǵy sporttyń, densaýlyqtyń jáne shyǵarmashylyqtyń merekesi. «Aman keleshek» festıvali múmkindigi shekteýli mektep oqýshylaryn densaýlyǵy jaqsy qurbylarymen biriktire otyryp, Qazaqstan Respýblıkasynda ınklıýzıvtik qoǵamnyń damýyna óz úlesin qosyp keledi, -dedi Qordyń atqarýshy dırektory Qanat Jumabaev.
«Aman keleshek - 2017» festıvaline Astana, Almaty, Qyzylorda, Aqmola, Almaty, Jambyl, Qaraǵandy, Pavlodar jáne Ońtústik Qazaqstan oblystarynyń balalary qatysty.
Uıymdastyrýshylar álemde talqylanyp jatqan balalar taqyrybyn festıvaldyń baǵdarlamasyna engizgen. Máselen, bıylǵy jyly balalar sheksiz ǵarysh álemi men jańa tehnologııalar kórinisin tamashalady.
Іs-sharalardyń negizgi kestesi 8 taqyryptyq alańǵa bólingen, olardyń árbireýi kún júıesindegi planeta ataýlarymen atalady.
Festıval aıasynda A. Seleznev atyndaǵy Almaty horeografııalyq ýchılışesi zamanaýı bı, sondaı-aq klassıkalyq bı negizderi boıynsha sheberlik sabaqtaryn ótkizse, «Altyn Taı» at klýby atqa minýdi úıretti.
Barlyq kóshpeli alańdarda sheberler ekskýrsııalar júrip, feıerverk shoý, «Aman keleshek» ánurany, holı boıaýyn shashý fleshmoby boldy.
