Almatyda oqýshylardyń 95% oflaın, 5% onlaın formatta bilim alyp jatyr

ALMATY. QazAqparat - Almatyda qazirgi tańda 291 mektep jumys isteıdi. Onyń 207-i memlekettik, 84-i jekemenshik. Olarda 303 myńnan astam oqýshy oqıdy.

Bul týraly Almaty óńirlik kommýnıkatsııalar qyzmeti alańynda Almaty qalasy bilim basqarmasynyń basshysy Lázzat Jylqybaeva málimdedi, dep habarlaıdy QazAqparat tilshisi.

«Jańa oqý jylynyń basynan bastap oqytý dástúrli formatta uıymdastyryldy. Qazirgi tańda oqýshylardyń 95%-y oflaın (287 955 oqýshy) jáne 5%-y onlaın oqıdy. Kúndelikti júrgiziletin monıtorıng nátıjelerine sáıkes, búginde qashyqtyqtan oqytý formatynda barlyǵy 15 155 oqýshy oqıdy», - dedi bilim basqarmasynyń basshysy.

Mektep qyzmetkerleri de 100% vaktsınalanǵan. Tek medıtsınalyq kórsetilimi bar 1 937 qyzmetker vaktsınalanǵan joq.

«Aǵymdaǵy oqý jylynda Bilim jáne ǵylym mınıstrliginiń buıryǵyna sáıkes, mektep oqýshylary úshin qysqy kanıkýl 2021 jylǵy 30 jeltoqsannan bastap 2022 jylǵy 9 qańtarǵa deıin qosa alǵanda 11 kúnge sozylady. Sonymen qatar, daıarlyq jáne birinshi synyp oqýshylary qysta qosymsha 7 kún demalys alady, ıaǵnı, 2022 jylǵy 7-13 aqpan aralyǵynda demalady», - dedi Lázzat Jylqybaeva.

Onyń aıtýynsha, sondaı-aq, Bilim mınıstrligi «Qazaqstan balalary- qysqy ertegi» atty qysqy demalys kezeńinde balalardyń demalysy men bos ýaqytyn uıymdastyrý boıynsha usynymdar ázirlegen, olardy jumysta paıdalaný úshin barlyq mektepterge berildi.