Almatyda oqýshylar tórtinshi toqsandy qashyqtan oqyp bastaıdy
ALMATY. QazAqparat - Almaty mektepteri qaıtadan qashyqtan bilim berýge kóshedi. Bul týraly onlaın brıfıng barysynda Almaty qalasynyń bas memlekettik sanıtar dárigeri Jandarbek Bekshın málim etti, dep habarlaıdy QazAqparat tilshisi.
Onyń aıtýynsha, mektep pen balabaqshadaǵy balalar arasynda vırýs juqtyrý jaǵdaıy kúrt ósken.
«Bıyl mektepke deıingi balalar arasynda vırýs juqtyrý eki ese kóbeıdi, oǵan qosa oqýshylardyń da indet juqtyrýy joǵary. Mýtatsııadan ótken shtamdar kishkentaı balalarǵa da áserin tıgizýde. Byltyr 281 oqýshy aýyrsa, bıylǵy jyldyń úsh aıynda 1 468 bala vırýs juqtyrǵan. Sol sebepti osy joly qatań shekteý sharalaryn engizdik», - deıdi Jandarbek Bekshın.
Sondaı-aq ol qaladaǵy barlyq mektepter qashyqtan bilim berýge kóshetinin, tek kezekshi toptarda ǵana dástúrli formatty bilim alatynyn aıtty.
«Ata-analardyń ótinishi boıynsha kezekshi toptar ashylady. Ondaǵy oqýshylar sany 15 baladan aspaýy qajet. Bul 1-5 synyptar jáne halyqaralyq deńgeıde oqıtyn mektepterdegi 1-7 synyptarǵa qatysty. Sonymen qatar, mektepti bitiretin 9 ben 11 (12) synyptarda da kezekti top ashylady», - dedi ol.
