Almatyda oqýshylar tóbelesi: Bir jasóspirim aýrýhanada jatyr
ALMATY. QazAqparat- Almatylyq 13 jasar mektep oqýshylary tóbelesip, onyń bireýi aýrýhanaǵa tústi, dep habarlaıdy QazAqparat tilshisi.
Jasósipirimder arasyndaǵy janjal 3 qyrkúıek kúni keshki saǵat 19:00-de bolǵan. Medeý aýdanynda ornalasqan №100 mekteptiń oqýshylary sabaqtan keıin ózara kúsh synaspaq bolǵan.
«BAQ ókilderi taıaq jegen balanyń ata-anasynyń sózi boıynsha aqparat taratyp jatyr. Birinshiden, oqýshylar sabaq bitkennen keıin tóbelesken. Bireýiniń aty jóni Aleksandr Vodnıkov. Osy mekteptiń burynǵy oqýshysy. Osydan bir jyl buryn sport mektebine aýysyp ketken. Alaıda, bıyl óziniń synybyna qaıtyp keldi. Ekinshi oqýshy - Rýstam Býharov. Synyptastar sabaqtan keıin ózara kúsh synaspaq bolypty. Qastarynda taǵy eki synyptasy boldy. Solardyń aıtýynsha, Rýstam Aleksandrdy ıterip jibergen. Jerge qulaǵan Aleksandr orynynan atyp turyp, Rýstamnyń jaǵynan uryp jibergen. Ol jerde Rýstamǵa eshkim jabylǵan joq. Sodan keıin, bári úılerine qaıtqan. Aleksandr Vodnıkov «jetim» bala, ol qamqorshysynyń qolynda tárbıelenip jatyr»,- deıdi Medeý aýdandyq bilim bóliminiń basshysy Aǵaısha Saparova.
Aǵaısha Saparovanyń aıtýynsha, Rýstam Býharovty ata-anasy №5 qalalyq klınıkalyq aýrýhanaǵa (jaq jáne bet LOR-hırýrgııasy) aparǵan. Qolymyzda jaraqaty aýyr emes degen anyqtama bar.
Sondaı-aq, Almaty qalalyq Qoǵamdyq densaýlyq saqtaý departamenti zardap shekken oqýshynyń jaǵdaıy týraly aıtty.
«Bala neırohırýrgııa bóliminde jatyr. Dıagnoz: jabyq bas mı jaraqaty, mıdyń shaıqalýy, jaǵdaıy ortasha aýyr dep baǵalanady. Emdeý sharalary júrgizilip jatyr», - dep habarlady Densaýlyq saqtaý basqarmasy.
