Almatyda oqýshylar taý bókterinde aıaǵyn syndyryp alǵan áıeldi qutqardy (FOTO)
ALMATY. QazAqparat - Almatyda bir top mektep oqýshylary taý bókterinde aıaǵyn syndyryp, júre almaı qalǵan áıeldi qutqaryp qaldy. Bul týraly búgin Almaty qalasynyń qorǵanys isteri jónindegi departamentiniń baspasóz qyzmeti habarlady.
«5 maýsymda №19-shy orta mekteptiń oqýshylary - «Kırov» áskerı-patrıottyq klýbynyń tárbıelenýshileri taýǵa jasalǵan eseptik joryqtan qaıtyp kele jatyp, taý bókterinde aıaǵyn syndyryp júre almaı qalǵan jalǵyz áıeldi kórip qalady. Oqýshylar tez arada oǵan alǵashqy medıtsınalyq kómek kórsetedi. Keıin, 7-shi synyp oqýshysy Dýman Manapov áıeldi kóterip alyp júrý úshin jamylǵy plaşty zembil retinde paıdalanýdy usyndy. Osylaısha, oqýshylar áıeldi taýdan tómen qaraı 2 shaqyrymdaı alyp júredi. Keıin, aldarynan shyqqan Tótenshe jaǵdaılar qyzmetiniń qyzmetkerlerine áıeldi tapsyrady. Zardap shekken áıel kózine jas alyp, oqýshylarǵa sheksiz alǵysyn bildirdi», - delingen habarlamada.
Budan keıin, kóp uzamaı Tótenshe jaǵdaılar qyzmetiniń qyzmetkerleri balalarǵa rızashylyǵyn bildirip, olardy ózderiniń jattyǵý bazasyna kelýge shaqyrdy. Onda tárbıelenýshiler qutqarý qyzmeti boıynsha ár túrli jattyǵýlar jasaýǵa múmkindik aldy.
Qazirgi tańda «Kırov» áskerı-patrıottyq klýbynyń tárbıelenýshilerin marapatqa usyný máselesi sheshilip jatyr.
Al zardap shekken áıeldiń hali turaqtaldy.
Aıta ketelik, qaladaǵy áskerı-patrıottyq klýbtardyń qyzmetine Almaty qalasynyń qorǵanys isteri jónindegi departamenti jetekshilik jasaıdy. 
