Almatyda oqýshylar qazaqtyń batyr qyzdarynyń eskertkishterine gúl shoqtaryn qoıdy

ALMATY. QazAqparat - Almaty áskerı patrıottyq klýbtarynyń tárbıelenýshileri  Keńes Odaǵynyń Batyry ataǵyn alǵan Shyǵystyń qos juldyzy Mánshúk Mámetova men Álııa Moldaǵulovanyń eskertkishterine gúl shoqtaryn qoıdy, dep habarlaıdy QazAqparat tilshisi.

 Qalalyq Qorǵanys departamentiniń baspasóz qyzmeti habarlaǵandaı, bul rásimge maıdangerler men tyl ardagerleri, №72, 19 mektep oqýshylary, jastar uıymdarynyń ókilderi qatysty.

Olar surapyl soǵys jyldarynda erlikpen qaza tapqan mıllıondaǵan jaýyngerlerdi eske aldy.

Departamenttiń habarlaýynsha, urys dalasynda mert bolǵan UOS ardagerlerin eske alýǵa arnalǵan saltanatty jıyndar jylyna birneshe ret ótkiziledi.

«Orta mekteptegi áskerı patrıottyq tárbıe jumystary áskerı qyzmetke daıarlaýǵa kómektesedi», - dedi áskerı patrıottyq klýbtyń tárbıelenýshisi Dıdar Ǵalymjanov.

«Ásker tarıhy - Otan qorǵaýshylardyń erligi men qaıtpas qaısarlyǵynyń, qazaqstandyq sarbazdardyń aıbynynyń,  týǵan elimizdiń  tutastyǵynyń myzǵymas bóligi», - dedi ÁPK áskerı jetekshisi Baqytjan Perimbetov.

Almatyda 20 shaqty áskerı patrıottyq klýb bar. Bul uıymdarǵa 8-9-10 synyp oqýshylary erikti túrde múshe bolyp otyr. Oqýshylar klýb bazasynda bastapqy áskerı daıyndyq kýrsynan ótedi.

Mundaı klýbtarǵa Almaty qalasynyń jergilikti áskerı organdary jetekshilik etip, qanat jaıýyna jan-jaqty qoldaý kórsetip keledi.