Almatyda oqýshylar arasynda halyqaralyq baıqaý ótýde, onyń jeńimpazdary UBT-dan bosatylady
ALMATY. QazAqparat - Almatyda 250 jas ǵalym halyqaralyq baıqaýda baǵyn synap jatyr. Ómirbek Joldasbekov atyndaǵy dástúrli halyqaralyq konkýrs bıyl V ret uıymdastyrylyp otyr.
Saıysta osy jarystyń irikteý syndarynan súrinbeı ótken eń myqty 250 jas ǵalym matematıka men mehanıkalyq zertteý jumystary boıynsha baq synap jatyr. Búgin sońǵy saıystar ál-Farabı atyndaǵy Qazaq Ulttyq ýnıversıtetiniń mehanıka jáne matematıka fakýltetiniń ǵımaratynda bastaldy.
Bilim dodasyna Tájikstannan 33 oqýshy, Qyrǵyzstannan 14 oqýshy kelgen. Eki kúnge josparlanǵan konkýrsta barlyǵy 191 joba qorǵalmaq. Sonyń ishinen úzdik tanylǵan jobalardyń avtorlary memlekettik grant ıelenip, Ulttyq Biryńǵaı Testileýden bosatylady.
«Konkýrstyń negizgi maqsaty - oqýshylardyń matematıka ǵylymyna qatysty qyzyǵýshylyǵyn arttyryp, zertteýge qabileti bar oqýshylardy anyqtaý jáne qoldaý. Balalardyń izdenisi óte jaqsy. Mysaly, búgin daryndy bala bolsa, erteń óte jaqsy oqıtyn stýdent atanady. Bizdiń jeńimpazdar mehmat fakýltetine túsedi. Kópshiligi ınjener bolyp ketti. Sonymen, bul konkýrs oqýshylardyń bolashaq taǵdyryna óte jaqsy serpin beretin konkýrs», - dedi «Daryn» respýblıkalyq ǵylymı-praktıkalyq ortalyǵynyń dırektory Sholpan Qırabaeva.
