Almatyda oqýshylar arasynda fortepıanodan ótken baıqaýdyń jeńimpazdary anyqtaldy
ALMATY. QazAqparat - Búgin Almatyda mindetti fortepıano kýrsy boıynsha mýzykalyq kolledjderdiń ár túrli mamandyq boıynsha oqıtyn oqýshylary arasynda ótken tuńǵysh respýblıkalyq ashyq baıqaý máresine jetti.
Onyń jabylý rásimi P. Chaıkovskıı atyndaǵy mýzykalyq kolledjde ótti.
Esterińizge sala ketelik, 12 naýryzda osy óner ordasynda bastalǵan saıysqa elimizdiń 11 qalasynan: Astana, Almaty, Aqtaý, Qaraǵandy, Qyzylorda, Shymkent, Semeı, Aqtóbe, Pavlodar, Petropavl jáne Taldyqorǵan qalalarynan 83 oqýshy qatysqan bolatyn.
«Biz bul baıqaýdy QR Tuńǵysh Prezıdenti - Elbasy qorynyń qoldaýymen joǵary deńgeıde ótkizdik. Bul naǵyz mýzyka merekesi ispetti boldy. Búkil respýblıkadan kelgen ár túrli mamandyq ıeleri ózderiniń fortepıano boıynsha sheberlikterin pash etti. Men balalardyń ónerine rıza boldym. Qazaqstanda mýzyka jaqsy deńgeıde damyp jatyr, onyń bolashaǵy zor, - dep aıtýǵa bolady. Búgin zor qýanyshpen osy ıgi sharany aıaqtap, jeńimpazdardy marapattaımyz», - dedi óz sózinde P. Chaıkovskıı atyndaǵy mýzykalyq kolledjdiń dırektory Birjan Hasanǵalıev.
Sonymen, baıqaý qorytyndysy boıynsha P. Chaıkovskıı atyndaǵy mýzykalyq kolledjdiń oqýshylary: Nurdáýlet Qadyrbaı, Álisher Qadyrov, Dıana Ýdovıchenko jáne Alýa Tóleýtaevalar úzdik nátıje kórsetip, alty gran-prı júldesiniń tórteýin jeńip aldy. Qalǵan eki gran-prı júldesi Petropavl qalalyq mýzykalyq kolledjiniń oqýshysy Vera Alaeva men Semeı qalalyq mýzykalyq kolledjiniń oqýshysy Janel Safıevaǵa tabys etildi.
Sonymen qatar, 12 oqýshy birinshi orynǵa ıe boldy. Olardyń segizi - P. Chaıkovskıı atyndaǵy mýzykalyq kolledjiń oqýshylary. Buldardan basqa, 14 oqýshy ekinshi oryndy, taǵy 14 oqýshy úshinshi orynǵa ıe boldy. Olarǵa ekinshi jáne úshinshi dárejeli dıplomdar tabys etildi. Qazaqstandyq kompozıtorlardyń pesalaryn úzdik oryndaǵan 5 oqýshy men sheteldik kompozıtorlardyń pesalaryn úzdik oryndaǵan 3 oqýshy arnaıy dıplomdarmen marapattaldy. 22 oqýshyǵa qatysqandary úshin gramotalar berildi.
Sondaı-aq, júldegerlerdiń barlyǵyna aqshalaı syıaqy tabys etildi.
Aıta ketelik, baıqaýǵa tórt mamandyq: mýzyka teorııasy, horǵa dırıjerlik etý, akademııalyq vokal, estradalyq vokal jáne dástúrli vokal boıynsha bilim alatyn oqýshylar qatysqan bolatyn.
Uıymdastyrýshylardyń aıtýynsha, bul baıqaý endi aldaǵy ýaqytta elimizde dástúrli túrde ótkizilip turatyn bolady.
