Almatyda oqýshy terakt jasaıtynyn habarlaǵan
ALMATY. QazAqparat – Almatyda 14 jasar jasóspirim terakt jasaıtynyn aıtyp, eldi dúrliktirdi, dep habarlaıdy QazAqparat tilshisi.
Almaty qalalyq Polıtsııa departamenti baspasóz qyzmetiniń málimetinshe, jasóspirim bul týraly jergilikti turǵyndardyń biriniń WhatsApp nomerine jazǵan. Ol 8 sáýirde Almatynyń Medeý aýdanynda ornalasqan turǵyn úılerdiń birin jaryp jiberýdi josparlap otyrǵanyn aıtqan.
«Bul aqparat jedel áreket etýdi qajet etti. Habarlama túse salysymen qalanyń barlyq tótenshe jaǵdaılar qyzmetiniń ókilderi dereý osy mekenjaıǵa baryp, saperlardyń kómegimen ǵımaratqa komıssııalyq tekserý júrgizdi. Jarylǵysh zattar tabylǵan joq. Aqparat rastalmady. Onyń avtory jedel-izdestirý sharalarynyń arqasynda tez tabyldy.Ol joǵaryda atalǵan kóppáterli úıdiń biriniń 14 jastaǵy turǵyny ekeni belgili boldy. Jasóspirim óziniń jasaǵan áreketin moıyndap, ony buzaqylyq nıetpen jibergenin aıtty. Bul fakt sotqa deıingi tergeýdiń biryńǵaı tizilimine QR QK-niń 273-baby boıynsha tirkeldi», - deıdi Almaty qalalyq PD bastyǵynyń orynbasary Berik Ábilbekov.
Sondaı-aq, polıtsııa, terrorızm aktisi boıynsha jalǵan aqparat taratqany úshin alty jylǵa deıin bas bostandyǵynan aıyrýdy kózdeıtin qylmystyq jaýapkershilik qarastyrylǵanyn eskertti.
