Almatyda oqýlyqpen qamtýǵa 1 mlrd. 999 mln. teńge bólindi
ALMATY. QazAqparat - Almatyda mektep oqýshylaryn oqýlyqpen qamtýǵa 1 mlrd. 999 mln. teńge bólindi. Bul týraly qalalyq bilim berý basqarmasynyń basshysy Rahat Shımasheva aıtty.
«Jergilikti bıýdjetten oqýlyqpen qamtýǵa 1 mlrd. 999 mln. teńge qarastyryldy. Ótken jylǵymen salystyrǵanda 500 mln teńgege artyq. 20 baspamen kelisim shart jasaldy. Qazir oqýlyqtar mektepterge jetkizilip, oqýshylarǵa taratylyp jatyr», - dedi basqarma basshysy.
Onyń aıtýynsha, oqýlyqtarǵa ótinim jınalǵan kezde mindetti túrde ata-analardyń, ustazdardyń suranysy eskerilgen.
«Ata-analardyń suranysy eskerile otyryp jasalǵandyqtan oqýlyqtar tapshylyǵy bolmaıdy dep oılaımyn», - dedi ol.
Basqarma basshylyǵy qosymsha oqýlyqtar alýǵa májbúrleý bolǵan jaǵdaıda mektep dırektorynan túsinikteme alynatynyn jetkizdi.
Mamandardyń aıtýynsha, bıyl qalada mektep formasy, qural-jabdyqtarynyń baǵasy ózgermeıdi.
Baǵany turaqtandyrý maqsatynda 8 aýdanda 21 mektep jármeńkesi ótken.
«Baǵanyń negizsiz kóterilýin qadaǵalaý maqsatynda arnaıy shtab qurylyp, kóptegen saýda oryndaryn aralap shyqtyq. Esh jerde baǵanyń kóterilgenin baıqamadyq. Otandyq kıim tigýshiler «Glassman», «Angelher», «Symbat» tigin fabrıkalary baǵany kótermeıtindigin jetkizdi. «Abdı» kompanııasy 3 aı boıy mektep quraldary qymbattamaıdy dep sendirdi», - dedi basqarma basshysy R.Shımasheva.
