Almatyda oqý jyly bastalǵanǵa deıin 100 jańa avtobýs qoldanysqa beriledi
ALMATY. QazAqparat - Almatyda turǵyndarǵa qyzmet kórsetý sapasy men jaılylyqty arttyrý úshin oqý jyly bastalǵanǵa deıin 100 jańa avtobýs qoldanysqa beriledi, dep habarlaıdy QazAqparat tilshisi.
Almaty ákimdigi málim etkendeı, qazirgi ýaqytta qalalyq avtopark 30 avtobýspen tolyqty, qalǵan 70-i jaqyn arada kelýi tıis.
«Bul avtobýstar esebinen jyljymaly quram №37, 38, 38a jáne 201 marshrýttarda jańartylady. Ári №24, 125, 131 marshrýttarǵa avtobýstar qosylady, ıaǵnı qoldanystaǵy marshrýttar jańa avtobýstarmen tolyǵady», - delinedi ákimdiktiń habarlamasynda.
Eske salsaq, buǵan deıin Almaty ákimi Erbolat Dosaev halyqpen kezdesýlerde 2023 jyly Almatyda qosymsha 600 jańa avtobýs satyp alynatynyn aıtqan.
«Qoǵamdyq kólikti damytý biz úshin basty basymdyqtardyń biri. Halyqtyń shaǵymynyń deni qoǵamdyq kólik jumysynyń sapasyna, atap aıtqanda, keıbir qoldanystaǵy marshrýttardyń jaısyzdyǵyna jáne josparly qozǵalys aralyǵyn saqtamaýǵa qatysty. Sondyqtan biz bul máselelerdi sheshýdi qolǵa alyp jatyrmyz», - degen bolatyn Erbolat Dosaev.
Qalǵan 500 avtobýsty satyp alýǵa shart jasaldy.
Aıta keteıik, búgingi kúni Almatyda barlyǵy 2000-nan astam avtobýs, 163 marshrýt, 24 tasymaldaýshy jumys isteıdi.
