Almatyda oqý oryndaryn bitirgen mamandardyń 68 paıyzy jumysqa ornalasady - qala ákimi
ALMATY. 6 qazan. QazAqparat - Elimizdegi árbir úshinshi ýnıversıtet Almatyda ornalasqan jáne árbir úshinshi Qazaqstan azamaty Almatyda bilim alýda. Ony qala ákimi Ahmetjan Esimov keshe Turar Rysqulov atyndaǵy Qazaq ekonomıka ýnıverıtetiniń 50 jyldyq mereıtoıyna oraı Respýblıka saraıynda ótken saltanatty keshte aıtty.
"1963 jyly Almaty halyq sharýashylyǵy ınstıtýty bolyp qurylyp, keıinnen T.Rysqulov atyndaǵy Qazaq ekonomıka ýnıversıteti atanǵan oqý orny búgingi tańda ǵylymı ortada óziniń laıyqty ornyna ıe bolyp, bilim berý salasynda naqty baǵytyn aıqyndaǵan. Oqý orny qurylǵaly beri elimizde jáne basqa da shet elderde tabysty etip júrgen myńdaǵan túlekterdi daıyndap shyǵardy. T.Rysqulov atyndaǵy Qazaq ekonomıka ýnıversıteti óziniń túlekterimen maqtana otyryp, zamanaýı talaptarǵa saı mamandar daıarlaıdy. Eger qala boıynsha oqý oryndaryn bitirgen mamandardyń 68 paıyzy jumysqa ornalasatyn bolsa, bul QazEÝ-de 87 paıyzǵa jetip otyr. Árıne bul óte jaqsy kórsetkish", - dedi A.Esimov.
Shahar basshysynyń aıtýynsha, bul oqý ornyn jyl saıyn ekonomıka jáne qarjy salalary boıynsha úsh myńnan astam stýdent bitiredi. Olardyń kópshiligi respýblıka jáne qala kásiporyndarynda óz bilimin sátti júzege asyrýda. Onyń túlekteri arasynda Úkimet músheleri, Parlament depýtattary az emes. Máselen búgingi tańda olar úsh júzden astamy salyq jáne qarjy qurylymdary mekemelerinde basshylyq qyzmet atqarýda.
