Almatyda ókpesiniń 88% zaqymdanǵan naýqas jazylyp shyqty
ALMATY. QazAqparat – Ortalyq qalalyq klınıkalyq aýrýhana dárigerleri ókpesiniń 88 paıyzy zaqymdanǵan syrqatty emdep shyǵardy, dep habarlaıdy QazAqparat tilshisi.
Koronavırýs ınfektsııasy saldarynan 59 jastaǵy patsıent ózdiginen tynys alý qabiletinen aıyrylǵan. Bul týraly «Áleýmettik medıtsınalyq saqtandyrý qory» KEAQ Almaty qalalyq fılıaly habarlady.
Almatylyq Vladımır Shestakov qaýipti vırýspen bir aıdan astam ýaqyt kúresti. Eki ókpesi birdeı qabynǵan naýqas eki apta boıy jansaqtaý bóliminde jatty.
«Naýqastyń qyzy Olga Chıstıakova Medıtsınalyq saqtandyrý qorynyń Qoldau 24/7 mobıldi qosymshasy arqyly aýrýhana dárigerlerine alǵys joldapty. Jyldyń basynda iske qosylǵan qosymsha halyq arasynda úlken suranysqa ıe bola bastady. Azamattar Qoldau 24/7 arqyly shaǵym ǵana emes, emdegen dárigerler men medıtsına mekemesi atyna alǵys joldaı alady. Jyl basynan beri qosymsha arqyly 700-ge jýyq alǵys hat kelip tústi», - deıdi fılıal basshysy Tileýhan Ábildaev.
Olganyń aıtýynsha, ákesi bıylǵy jyldyń 25 maýsymynda syrqattanǵan. Bastapqyda dárigerler oǵan ótkir respıratorlyq vırýstyq ınfektsııa degen dıagnoz qoıǵan. Biraq taǵaıyndalǵan emnen paıda bolmaǵan soń, kompıýterlik tomografııa jasalǵan. KT nátıjesi ókpeniń 88% astamy zaqymdanǵanyn rastasa, PTR test syrqattyń COVID-19 vırýsyn juqtyrǵanyn anyqtap berdi.
«Ákemdi birden ІІM gospıtaline jatqyzdy. Biraq beti beri qaraı qoımaǵan soń, Ortalyq qalalyq klınıkalyq aýrýhanaǵa aýystyrý týraly sheshim qabyldandy. Aýrýhana dárigerleri ákemdi emdep jazamyz degen sózinde turdy. 28 maýsymda óz aıaǵymen aýrýhanadan shyqty. Ortalyq qalalyq klınıkalyq aýrýhanada altyn qoldy dárigerler jumys isteıdi. Solardyń bilimi men biliktiliginiń arqasynda ákem aýyr naýqastan qulan-taza aıyqty», - dep jazdy alǵys bildirgen Olga Chıstıakova.
Emdeýshi dáriger Myńjan Meńlibekovtiń aıtýynsha, patsıent OQK aýrýhanaǵa aýyr halde túsken.
«Koronavırýs ınfektsııasyn juqtyrǵan patsıenttiń ókpesi zaqymdanyp, vırýsty pnevmonııaǵa shaldyqqan. Bul patsıenttiń ókpesi ottegi apparatyna qosqanǵa deıin 97 protsentke deıin zaqymdanyp úlgerdi. Birden tıisti dári-dármekter berdik, ottegige qosqannan keıin jaǵdaıy edáýir jaqsardy», - deıdi M.Meńlibekov.
Fılıal málimetinshe, 3 naýryz ben 28 shilde aralyǵynda Almaty qalasy boıynsha koronavırýs ınfektsııasyna qarsy kúreske 26 medıtsına mekemesi jumyldyrylǵan. Onyń 21-i – ınfektsııalyq statsıonar, 17-si – provızorlyq, 1 – kantındik statsıonar. Osy ýaqyt aralyǵynda atalǵan aýrýhanalardan 29 667 adam emdelip shyqqan. Oǵan 3,2 mlrd teńgeden astam qarajat jumsaldy.
