Almatyda ókpesi 100% zaqymdanǵan áıel jazylyp shyqty
ALMATY. QazAqparat – Almatyda ókpesi 100% zaqymdanǵan áıel shuǵyl kómek kórsetý aýrýhanasynan emdelip, úıine shyqty, dep habarlaıdy QazAqparat tilshisi.
Almatylyq Maıra Quspanovanyń aıtýynsha, búgingi týǵan kúnin eshqashan umytpaıdy. Ol óziniń týǵan kúninde Almaty qalalyq jedel shuǵyl kómek kórsetý aýrýhanasynan aman-esen shyqty. Munda ol bir aı koronavırýsten emdeldi.
Almaty qalalyq Qoǵamdyq densaýlyq saqtaý basqarmasynyń málimetinshe, naýqas aýrýhanaǵa 1 sáýir kúni ókpeniń 100 paıyz zaqymdanýymen aýyr halde túsken. Onyń ómirin saqtap qalý úshin dárigerler jansaqtaý bóliminde eki apta kúresti. Ol ókpeni jasandy jeldetý apparaty men Higt Flow-da bes kún, ókpeni ınvazıvti emes jeldetý apparatynda úsh kún jatty.
«Men óz-ózime kele almaı, tynys alý apparatynda jatyp, o dúnıeni kórdim desem bolady. Aq halatty abzal jandarǵa myń alǵys. Atap aıtar bolsam, Gúlnar Berdalına, Gúlmıra Toıbaeva, Janat Ábdimoldaeva, Baktııar Bekishev, Aıdan Nurlybek, barlyq medbıkeler men sanıtar qyzdarǵa ekinshi ómirdi syılaǵany úshin kóp raqmet. Koronavırýsqa áli de senbeıtin adamdarǵa, vaktsına saldyrtyp, kútim jasaýdy usynamyn, densaýlyqqa artyq qaýip tóndirýdiń qajeti joq», - deıdi Maıra Quspanova.
Naýqastyń kúndelikti emdeý barysyn bas dáriger Almaz Djývashev bastaǵan aýrýhana meńgerýshileri baqylap otyrdy.
«Patsıenttiń saýyǵýy túrli mamandyqtaǵy dárigerlerdiń ýaqtyly kómegi, komandalyq jumys pen naýqastyń óziniń emdelýge degen peıiliniń nátıjesi. Jáne eń bastysy reanımatologtardyń arqasy»,- deıdi dáriger Gúlmıra Toıbaeva.
Búgin aýrýhana qyzmetkerleri Maıra Quspanovany týǵan kúnimen quttyqtap, úıine shyǵaryp saldy.
