Almatyda OQKA qyzmetkerlerin jumysqa ornalastyrý máselesi qaraldy
ALMATY. QazAqparat – Almaty ákiminiń orynbasary Erjan Babaqumarov onlaın-baılanys rejıminde Ortalyq qalalyq klınıkalyq aýrýhana ujymymen jınalys ótkizdi, dep habarlaıdy QazAqparat tilshisi.
Otyrysqa Qoǵamdyq densaýlyq saqtaý basqarmasynyń basshysy Tileýhan Ábildaev, aýrýhananyń bólim meńgerýshileri men dırektordyń orynbasary qatysty.
Jıynda jumysqa ornalastyrý jáne koronavırýsqa qarsy kúreske jumyldyrylǵan, ınfektsııany juqtyrǵan medıtsına qyzmetkerlerine ústemeaqy tóleýdi júzege asyrý boıynsha eńbek ujymynyń máseleleri qaraldy. Sonymen qatar, Ortalyq qalalyq klınıkalyq aýrýhana bas dárigeriniń mindetin ýaqytsha atqarýshy Gúlnar Qulqaevanyń baıandamasy tyńdaldy.
Gúlnár Qulqaevanyń aıtýynsha, aýrýhananyń 10 qyzmetkeri óz erkimen jumystan shyqqan. 1 maýsymǵa deıin saýyqqan 143 qyzmetker jumysqa ornalasady, al 1-15 maýsym aralyǵynda qalǵan barlyq qyzmetkerler jumysqa shyǵýǵa daıyn.
Otyrysqa qatysýshylar qalalyq karantın rejıminiń aıasynda qalyptasqan eńbek quqyǵyn odan ary retteý sharalary boıynsha Qoǵamdyq densaýlyq saqtaý basqarmasynyń tásilderin qarastyrdy.
Ortalyq qalalyq klınıkalyq aýrýhana qyzmetkerleri úshin aǵymdaǵy jyldyń 1 maýsymynan bastap 15 kúnnen vahtalyq jumys ádisi belgilengen, alaıda bul ádis jansaqtaý bólimindegi mamandarǵa qatysty emes, olar úshin saǵattyq jumys kestesi qarastyrylǵan.
Sonymen birge, OQKA qyzmetkerlerin barynsha №4, №7 aýrýhana men qalalyq jedel shuǵyl kómek kórsetý aýrýhanasynadaǵy bos oryndarǵa jumysqa ornalastyrý tapsyryldy.
Sondaı-aq, jumysqa ornalastyrylmaǵan OQKA qyzmetkerlerine óndiristiń toqtap turǵan kezeńinde jergilikti bıýdjet qarjysy esebinen ortasha aılyq eseppen jalaqy tóleý josparlanyp otyr.
Ústemaqy máselesi boıynsha arnaıy jumys toby quryldy, tizimder jasaldy, jaqyn arada densaýlyq saqtaý mınıstrliginiń arnaıy toby júrgizgen tergeý amaldarynyń resmı nátıjesi kútilýde. Soǵan baılanysty sońǵy sheshim qabyldanady.
