Almatyda ógeı ákesinen taıaq jegen 2 jasar bala es-tússiz jatyr
ALMATY. QazAqparat – Almatyda 2 jasar balany soqqyǵa jyqqan er adam ustaldy, dep habarlaıdy QazAqparat tilshisi.
Qalalyq polıtsııa departamentiniń habarlaýynsha, 23 qyrkúıek keshki 16:00 shamasynda Alataý aýdanynyń polıtsııa basqarmasynyń kezekshi bólimine aýrýhanadan habar kelip jetken.
«Medıtsına qyzmetkerleri 2 jasar ul balanyń es-tússiz jatqanyn aıtty. Balanyń mıynda qan uıyǵan, kóp jaraqat alǵan, ishi soǵylǵan, aıaq-qoldary urylǵan. Bala komaǵa túsip qalǵan. Polıtsııa eń aldymen balanyń 34 jastaǵy ógeı ákesinen suraq-jaýap alǵan. Basynda ol bala qulap qaldy degen ýáj aıtty. Keıinnen tergeý materıaldarynyń arqasynda uldy ógeı ákesi urǵany anyqtaldy. Belgili bolǵandaı, balanyń anasy ol kezde jumysta bolǵan. Jylaǵan balany jubata almaǵan ógeı ákesi uryp tastapty», - deıdi Jergilikti polıtsııa qyzmeti ıývenaldy polıtsııa bóliminiń basshysy Leıla Álipbaeva.
Erli-zaıyptylar azamattyq nekede turǵan. Osydan 1,5 aı buryn Almaty oblysynan qalaǵa kóship kelgen «Kókqaınar» shaǵyn aýdanynda turyp jatqan.
«Qazir bul jantúrshigerlik oqıǵa boıynsha QR QK 106-babynyń 1-bólimimen qylmystyq is qozǵaldy. Qazir kúdikti qamaýda otyr. Buryn ol birneshe ret urlyq úshin qylmystyq jaýapkershilikke tartylǵan», - dedi Láıla Álipbaeva.
