Almatyda oblystyq ardagerler uıymdarynyń jetekshilerine arnalǵan respýblıkalyq semınar-keńes ótip jatyr
ALMATY. Qyrkúıektiń 23-i. QazAqparat /Erbol Azanbek/ -Almatyda oblystyq ardagerler uıymdary jetekshilerine arnalǵan respýblıkalyq semınar-keńes ótip jatyr, dep habarlaıdy QazAqparat.
Keshe bastalǵan semınar-keńestiń maqsaty oblystar men Astana qalasy ardagerler uıymdarynyń basshylaryna Almaty qalalyq ardagerler keńesiniń tájirıbesin úıretý. Bul maqsatta qalalyq ákimshilikte arnaıy jıyn ótip, onda Almaty qalasyndaǵy keńestiń jumysy tanystyryldy. Búgin semınarǵa qatysýshylar qalalyq keńestiń jastarmen jumysyn kózben kórý maqsatynda Qazaq Ulttyq ýnıversıteti basshylyǵymen kezdesip, 2-shi shaǵyn aýdandaǵy ardagerler úıiniń jumysymen tanysady. Sondaı-aq 28-shi panfılov parkindegi máńgilik alaýǵa gúl shoǵyn qoıyp, Jetisý aýdandyq ardagerler uıymynyń, № 148 mektep-gımnazııasynda bolady.
Almaty qalalyq Ardagerler keńesiniń tóraǵasy, QR UǴA Akademıgi Erenǵaıyp Shaıhýddınovtyń aıtýynsha qalada 168 myń ardager bar. Onyń 2119-y Uly otan soǵysynyń ardageri, 21 myńy tyl ardageri, Uly Otan soǵysynda qaza tapqandardyń 2,5 myń jesiri, Keńes Odaǵynyń batyry, Úsh dárejeli «Dańq» ordeniniń 3 ıegeri, 23 Sotsıalıstik Eńbek Eri, «Qazaqstannyń Eńbek Eri» turady.
«Ardagerlerge Respýblıkalyq bıýdjetten, qalalyq ákimshilik pen máslıhat tarapynan úlken áleýmettik kómek kórsetilip turady. Mysaly 140 myń ardager 1 aılyq eseptik kórsetkish túrinde qalalyq járdemaqy alyp turady. Uly Otan soǵysyna qatysqandar men olarǵa teńestirilgenge, Uly otan soǵysynda qaza tapqandardyń jesirleriniń komýnaldyq tólemderi tólenedi. Qalalyq bıýdjetten 2 myń ardager sanatorıılerde tegin emdelip, qalalyq arýhanalarda tegin tis emdeý qyzmetin paıdalana alady. Sondaı-aq olarǵa ystyq, sýyq sý eseptegish quraldary tegin ornatylýda. Ardagerler qalalyq qoǵamdyq kólikterde tegin júrse, qalǵan zeınetkerler elý paıyz jeńildikpen júre alady. Bul jumystardyń júzege asýy qalalyq keńestiń júzege asyryp otyrǵan jumysynyń nátıjesi. Bul basqa oblystardyń ardagerler uıymyna úlken tájirıbe bolady dep oılaımyn» deıdi Erenǵaıyp Shaıhýddınov.
