Almatyda Ó. Jánibekovtyń týǵanyna 80 jyl tolýyna oraı «Ulydan ulaǵat, urpaqqa muraǵat» atty eske alý kesh ótti
ALMATY. 24 mamyr. QazAqparat /Ádilet Musahaev/ - Búgin Almaty qalasy tarıhynyń murajaıynda kórnekti memleket jáne qoǵam qaıratkeri, tarıhshy-etnograf, óner zertteýshi, ǵalym Ózbekáli Jánibekovtyń týǵanyna 80 jyl tolýyna oraı «Ulydan ulaǵat, urpaqqa muraǵat» atty eske alý keshi ótti.
Ó.Jánibekov 1988 jyly qazaqtyń bes arysy - Shákárim Qudaıberdıev, Ahmet Baıtursynov, Maǵjan Jumabaev, Mirjaqyp Dýlatov, Júsipbek Aımaýytov isin qaıta qaraıtyn QKP Ortalyq Komıtetinde arnaıy komıssııa uıymdastyryp, atalǵan qoǵam qaıratkerleriniń esimderin týǵan halqyna qaıta oralýyna belsene atsalysty. Onyń jasampaz ómiri men halyq úshin jasaǵan qyzmeti táýelsizdigimizdiń tarıhyndaǵy alǵashqy qadam ekeni aıqyn.
Kesh aıasynda qýǵyn-súrgin taqyrybyndaǵy materıaldardan kórme uıymdastyrylyp, Ó.Jánibekovtyń tikeleı bastaýymen qalpyna keltirilgen qundy jádigerler toptamasy qoıylǵan.
Sondaı-aq jıynǵa ǵalymnyń otbasy, saıası qýǵyn-súrgin qurbandarynyń urpaqtary jáne tarıhshylar qatysyp, Ó.Jánibekov jaıynda syr shertip, onyń eren eńbekteri jaıynda estelikter aıtty.
Atalǵan is-shara QR Táýelsizdiginiń 20 jyldyǵy men saıası qýǵyn-súrgin qurbandaryn eske alý kúnine oraı uıymdastyrylǵan.
