Almatyda O.Súleımenovtyń 75 jyldyq mereıtoıyna arnalǵan jıyn ótti
ATY. 27 sáýir. QazAqparat /Ádilet Musahaev/ - Búgin Almatydaǵy Qazaq Ulttyq agrarlyq ýnıversıtetinde tanymal jazýshy, aqyn, qoǵam qaıratkeri Oljas Súleımenovtyń 75 jyldyq mereıtoıyna oraı «O.Súleımenov jáne qazirgi zamanǵy ózekti máseleler» atty dóńgelek ústel ótti.
Jıyndy atalǵan ýnıversıtettiń tárbıe isi jónindegi prorektory Dına Júsipálıeva ashyp, qoǵam qaıratkeriniń atqarǵan eńbekteri men onyń shyǵarmashylyq ómirine toqtalyp ótti. "O.Súleımenov bizdiń JOO-ǵa kelgende stýdentterimizge rızashylyǵyn bildirdi. Óıtkeni gýmanıtarly salada mamandar daıyndamaıtyn ýnıversıtettiń stýdentteri de ádebıettiń poezııa, proza janrlarynan kende emestigine kóz jetkizdi. Bul jaıynda elimizdiń basylymdaryna maqala jazdy da»,-deıdi prorektor.
Sonymen qatar jıynǵa qatysqan professor, oqytýshy qaýymy O.Súleımenovtyń adamzatty qorǵaýǵa qosqan úlesi, Keńes ókimeti tusyndaǵy qıyn zamanǵa qaramaı "AZııA" atty kitabyn shyǵaryp, kúlli álemdi nazaryna aýdartqan eńbegine toqtalyp ótti. Sondaı-aq ol kisi ár qashanda ózekti másele tóńireginde óz únin qosyp júretindigi aıtyldy.
Aqynnyń mereıtoıyna arnalǵan mundaı sharalar mamyr aıynda ardagerler arasyndaǵy dátúrli voleıbol týrnırimen jáne stýdentterdiń teatrlandyrylǵan qoılymdarymen jalǵasady.
