Almatyda O. Súleımenovtiń 80 jyldyǵyna arnalǵan halyqaralyq ǵylymı konferentsııa ótip jatyr
ALMATY. QazAqparat - Almatyda ál-Farabı atyndaǵy Qazaq ulttyq ýnıversıtetiniń ǵylymı kitaphanasynda Qazaqstannyń halyq jazýshysy, kórnekti aqyn, memleket jáne qoǵam qaıratkeri Oljas Súleımenovtiń 80 jyldyq mereıtoıyna arnalǵan halyqaralyq ǵylymı konferentsııa ótip jatyr.
Oǵan ál-Farabı atyndaǵy QazUÝ rektory, tehnıka ǵylymdarynyń doktory Ǵalym Mutanov, Qazaqstan jazýshylar Odaǵynyń tóraǵasy Nurlan Orazalın, Qazaqstannyń qoǵam qaıratkeri, mádenıettanýshy, pýblıtsıst Murat Áýezov, sondaı-aq, basqa da aqyndar men jazýshylar, tanymal qoǵam qaıratkerleri, stýdentter jáne BAQ ókilderi qatysýda.
Konferentsııa bastalar aldynda QazUÝ rektory Ǵ. Mutanov Oljas Omarulyn kitaphana foıesinde qoıylǵan tanymal sýretshi Amandos Aqanaevtyń shyǵarmalarymen tanystyrdy. Olardyń ishinde O. Súleımenovtiń de kartınalary bar.
Óz sózinde Qazaqstannyń jazýshylar odaǵynyń tóraǵasy, aqyn, senator Nurlan Orazalın Oljas Súleımenovti qazaq halqynyń qazynaly rýhanı baılyǵynyń «eń bir kózge aıryqsha túsetin asýly beli» ekendigin aıtty.
«Oljas Súleımenov óziniń eń alǵashqy 1961 jyly sáýirde jazǵan «Adamǵa tabyn jer endi» poemasymen búkil dúnıejúzine qalaı tanylsa, sol tanylǵan bıiginen, óziniń sol rýhanı uly keńistiginen jazbaı, jańylmaı keledi. Oljastyń eń basty baılyǵy, eń basty ereksheligi - onyń boıynda qazaqty álemge tanytatyn úlken rýhtyń, úlken asqaqtyqtyń bar ekendigi. Onyń poezııasy birte-birte kemeńgerlerge tán oıshyldyqqa oıysty. Ol ǵylym men ádebıetti bir-birimen úılestirip, ushtastyra bildi. Osy úrdisti qazir de jalǵastyryp kele jatyr. Oljakeń halqynyń mahabbatyna bólengen tulǵa. Halqymen qashanda osylaı birge bola beredi», - dedi N. Orazalın.
Konferentsııanyń sektsııalyq otyrystarynda Oljas Súleımenovtyń «Az ı ıA», «Sóz kody» jáne basqa da shyǵarmalaryndaǵy túrkızmder, óleń uıqastary, janrlyq, folklorlyq elementter, balladalar, basqa da aspektileri talqylandy.
Konferentsııa odan ári jalǵasýda.
