Almatyda nysandar qurylysynyń sapasyn «halyq baqylaýshylary» qadaǵalaıtyn bolady
ALMATY. QazAqparat – Almaty turǵyndary megapolıstegi nysandar qurylysynyń barysyn baqylaı alady. Qurylys protsesine jedel qoǵamdyq monıtorıng júrgizý úshin jáne qandaı da bir buzýshylyqtar anyqtalǵan jaǵdaıda «halyq baqylaýshylary» dereý partııalyq baqylaý komıssııasyna habarlaıdy.
Joba «Nur Otan» partııasy qalalyq fılıalynyń basshysy, qala ákimi Baqytjan Saǵyntaevtyń tapsyrmasy boıynsha bastaý aldy, dep habarlaıdy QazAqparat tilshisi.
Megapolıs turǵyndary úshin eń ózekti máselelerdiń biri - mektep qurylysy. Qalada kóptegen jas otbasylar turady, olardyń arasynda kópbalaly otbasylar bar. Bul oqýshy oryndarynyń jetispeýshiligine ákeledi. Atalǵan máseleni qoldanystaǵy mektepterge japsarjaı salý arqyly sheshýge bolady.
Qalalyq fılıal tóraǵasynyń birinshi orynbasary Meıirjan Otynshıev máslıhat depýtaty Gúljan Bekenovamen birge Almaly aýdanynda ornalasqan №144 mektep-gımnazııasyna japsarlas 300 oryndyq oqý korpýsy qurylysynyń barysyn tekserdi. «Halyq baqylaýshylary» jaǵdaımen jeke tanysyp, merdigerlermen jáne tehqadaǵalaýmen kezdesti. Qazirgi ýaqytta akt zalynyń beton edenin quıý, ishki araqabyrǵalar men terezelerdi ornatý jumystary aıaqtaldy.
«Mektepterge japsarjaı salý balalardyń bilim alýy úshin tolyqqandy jaǵdaı jasaýǵa kómektesedi. Kelisimshartta jumystardy oryndaý merzimi aǵymdaǵy jyldyń jeltoqsan aıy dep kórsetilgen. Endi qurylys barysyn tek partııa men depýtattar ǵana emes, almatylyqtardyń ózderi de baqylaıtyn bolady. Bul másele partııanyń Jol kartasynda da kórinis tapqan. Mysaly, bıyl 12 600 oryndyq 8 mektep jáne 8 388 oryndyq 17 mektepke qosymsha japsarjaı salý qarastyrylǵan», - dep atap ótti partııanyń qalalyq fılıal tóraǵasynyń birinshi orynbasary Meıirjan Otynshıev.
Sonymen qatar, «Nur Otan» partııasy Almaty qalalyq fılıaly janyndaǵy partııalyq baqylaý komıssııasy men sybaılas jemqorlyqqa qarsy is-qımyl jónindegi Qoǵamdyq keńestiń jańa basshylary paıda boldy. Máselen, komıssııany basqarý quqyǵy depýtat Ámirjan Nábıevke senip tapsyryldy. Onyń depýtattyq korpýs boıynsha áriptesi, zań ǵylymdarynyń doktory, professor Záýresh Ómirbaeva sybaılas jemqorlyqqa qarsy is-qımyl jónindegi qoǵamdyq keńesti basqaratyn bolady.
