Almatyda Nurǵısa Tilendıevtiń «Jan sáýle», «Qustar áni», «Alataý» atty kitaptarynyń tusaýkeseri bolady
ALMATY. 11 sáýir. QazAqparat /Názıra Eleýhan/ - Almatyda 16 sáýir kúni Jambyl atyndaǵy Qazaq memlekettik fılormonııada qala ákimdigi men Mádenıet mınıstrliginiń qoldaýymen qazaqtyń kúıshi-sazgeri, dırıjer Nurǵısa Tilendıevtiń
«Jan sáýle», «Qustar áni», «Alataý» jáne «Mádenı mura» baǵdarlamasy aıasynda jaryq kórgen, QR eńbek sińirgen mádenıet qaıratkeri Jarqyn Shákárim men QR eńbek sińirgen ártisi, kompozıtor Darıǵa Tilendikelininiń «Nurǵısa Tilendıev» atty bıografııalyq kitaptarynyń tusaýkeseri bolady.
Atalmysh kitaptar el táýelsizdiginiń 20 jyldyǵyna oraı jaryqqa shyqty.
Tusaýkeser rásimine Almaty qalasy ákimdigi men Mádenıet mınıstrliginiń ókilderi, tanymal jazýshylar men qoǵam qaıratkerleri qatysady.
Basylymdardyń tanystyrylymynan keıin Qazaq memlekettik fılormonııanyń úlken zalynda N.Tilendıev atyndaǵy memlekettik akademııalyq folklorly-etnografııalyq orkestriniń kontserti ótedi. Dırıjeri - Dınara Tilendıeva.
Nurǵısa Tilendıev - qazaq mýzykalyq mádenıetine sazger, dırıjer, oryndaýshy retinde óshpes iz qaldyrǵan sýretker. Ol - 500-den astam mýzykalyq tól týyndylardyń avtory. Ol mol murada án de, kúı de, romans, ývetıýra, poema, kantata, opera, balet te bar. Onyń «Aqqý», «Ańsaý», «Arman», «Ata tolǵaýy», «Álqıssa», «Qorqyt týraly ańyz», «Kósh kerýeni», «Mahambet», «Farabı sazy» sııaqty kúıleri men «Saryjaılaý», «Alataý», «Aqjaıyq», «Aq qusym», «Óz elim» sııaqty ondaǵan ánderi halyqtyq boıaý-naqyshynyń qanyqtyǵymen, ózindik qoltańbasynyń aıqyndyǵymen jurtshylyqtyń súıip tyńdaıtyn rýhanı qazynasyna aınalǵan. Bunymen qatar, uly tulǵa qyryqtan astam pesaǵa jáne jıyrmadan astam fılmge mýzyka jazǵan.
Qazaqstan Halyq ártisi, Qazaqstan Respýblıkasy Memlekettik syılyǵynyń ıegeri, KSRO halyq ártisi N.Tilendıevke 1998 jyly Qazaqstan Respýblıkasy Prezıdentiniń jarlyǵymen «Halyq Qaharmany» ataǵy berildi.
