Almatyda Nurǵısa Tilendıevtiń shyǵarmashylyǵyna arnalǵan konferentsııa ótti
ALMATY. Aqpannyń 26-y. QazAqparat /Erbol Azanbek/ - Búgin Almatyda qazaqtyń talantty kompozıtory, dırıjer, dombyrashy,
QazKSR Memlekettik syılyǵynyń ıegeri, SSSR halyq ártisi, «Halyq qaharmany» Nurǵısa Tilendıevtiń 85 jyldyǵyna arnalǵan «Nurǵısa Tilendıev jáne zamanaýı qazaq óneri» atty ǵylymı-tájirıbelik konferentsııa ótti, dep habarlaıdy QazAqparat.
Konferentsııaǵa uly tulǵanyń týystary, áriptesteri, shákirtteri qatysyp Nurǵısa Tilendıev shyǵarmashylyǵy jaıynda estelikter aıtty. Ol týraly arnaıy túsirilgen derekti fılm kórsetildi. Konferentsııaǵa qatysýshylardyń aıtýynsha, Nurǵısanyń eń iri eńbekteriniń biri - «Otyrar sazy» orkestrin qurýy, dástúrli án men kúıge el mahabbatyn oıatýy. Búginde orkestr qazaq maqtanyshyna aınalǵan mýzykalyq ujymnyń biri. Qazirgi tańda atalǵan ujymdy Nurǵısa Tilendıevtiń qyzy Dinzýhra Tilendıeva basqarady. «Ákem meniń jadymda eńbek súıgishtigimen, óz mamandyǵyna shyn berilgen, ómirde qarapaıym jan retinde qaldy. Ákem mura retinde tastap ketken dırejer, kompozıtor degen atty óz bıiginen túsirmeý - maqsatym», deıdi Dinzýhra Nurǵısa qyzy.
«Nurǵısa Tilendıev - qazaqtyń mýzykalyq mádenıetinde qaıtalanbas iz qaldyrǵan eń iri tulǵalardyń biri. Ol barlyq jaǵynan erekshe edi. Onyń mýzykasy da, istegen isteri de erekshe», dep atap ótti QR eńbek sińirgen qaıratkeri, QR Memlekettik syılyǵynyń laýreaty Áshirbek Syǵaı.
