Almatyda Nurǵısa Tilendıevtiń páteri murajaıǵa aınaldy
ALMATY. QazAqparat - Almatyda qazaqtyń klassık kompozıtory Nurǵısa Tilendıevtiń páterinde murajaı ashyldy. Saltanatty sharaǵa qala ákimi Ahmetjan Esimov, zııaly qaýym ókilderi, mádenıet qaıratkerleri sondaı-aq kompozıtordyń jaqyn-jýyqtary qatysty.
Qala basshysy 500-ge jýyq mýzykalyq týyndynyń avtory, bıyl 90 jyldyǵy toılanatyn kompozıtordyń qazaq mádenıetine qosqan úlesi ushan-teńiz ekendigin atap ótti. «Almatydaǵy kóshelerdiń biri Nurǵısa Tilendıevtiń atynda. Ótken jyly ol kisiniń atyndaǵy eskertkishti ashtyq. Osy murajaıdyń ashylýy týma talantty eske alýdaǵy keshendi sharalardyń dástúrli jalǵasy bolmaq», - dedi ákim. Mádenı nysannyń ekspozıtsııasy erekshe shynaıy áser týǵyzady. Murajaıǵa kelýshilerdiń nazaryna hronologııalyq tártippen ornalasqan eksponattar usynylǵan. Kelýshiler qoljazba partıtýrasyn, kezinde kompozıtorǵa anasy syılaǵan antıkvarlyq kúısandyq, ataqty «Darıǵa dombyrany» tamashalaı alady.
