Almatyda Nurǵısa Tilendıevtiń kitaptary men ol týraly estelikter jınaǵynyń tanystyrylymy ótedi
ALMATY. 16 sáýir. QazAqparat /Erbol Azanbek/ - Búgin Jambyl atyndaǵy Qazaq Memlekettik fılarmonııasynda Nurǵısa Tilendıevtiń «Jan sáýle», «Qustar áni», «Alataý» kitaptarynyń jáne Jarqyn Shákerim, Darıǵa Tilendikelini jazǵan «Nurǵısa Tilendıev» ǵumyrnamalyq derekti hıkaıat kitabynyń tusaýkeseri bolady.
Asa talantty kompozıtor, Halyq qaharmanynyń qolynan shyqqan týyndylary men shyǵarmalary, ol týraly estelikter jınaqtalǵan kitaptar jurtshylyq nazaryna QR Mádenıet mınıstrligi jáne Almaty qalasy ákimdigi qoldaýymen Qazaqstan Táýelsizdiginiń 20 jyldyǵyna tartý retinde usynylyp otyr.
«Kitaptar Elbasy, tuńǵysh Prezıdent Nursultan Nazarbaevtyń bastamasymen júzege asyrylyp jatqan «Mádenı mura» baǵdarlamasynyń aıasynda, dástúrli mýzyka mádenıetimizdi urpaqqa jetkizý maqsatymen shyǵaryldy»,- deıdi kitaptardy qurastyrýshy Darıǵa Tilendikelini.
Tusaýkeser rásimine kitap avtorlary Qazaqstannyń eńbek sińirgen ártisi, kompozıtor Darıǵa Tilendikelini, Qazaqstan Jazýshylar odaǵynyń múshesi, Qazaqstannyń eńbek sińirgen qaıratkeri, «Qurmet» ordeniniń ıegeri Jarqyn Shákerim, belgili qoǵam jáne óner qaıratkerleri qatysady. Shara sońynda fılarmonııanyń úlken zalynda Dınara Tilendıevanyń dırıjerlyǵymen N. Tilendıev atyndaǵy Akademııalyq folklorly-etnografııalyq orkestiriniń kontserti ótedi.
