Almatyda Nurǵısa Tilendıevtiń eskertkishi boı kóterdi
MATY. 17 qazan. QazAqparat /Názıra Eleýhan/ - Senbi kúni Almatyda Halyq qaharmany, KSRO halyq ártisi, Qazaqstannyń eńbek sińirgen óner qaıratkeri, qazaqtyń uly sazgeri, ári dırıjeri Nurǵısa Tilendıevke eskertkish ornatyldy.
Eskertkishtiń ashylý saltanatynda Almaty qalasynyń ákimi Ahmetjan Esimov, belgili qoǵam qaıratkerleri, aqyn-jazýshylar men óner sheberleri, sonymen qatar, kompozıtordyń shákirtteri men týǵan-týystary boldy.
Eskertkishtiń avtory Meıirman Ázmaǵanbetovtyń aıtýynsha, músin eki aı ishinde jasalǵan. "Men uly tulǵanyń talantyna tabynýshylardyń birimin. Sondyqtan, músindi erekshe bir shabytpen, bar yqylasymmen jasadym",-deıdi ol.
Eskertkishte daryndy tulǵanyń sahnada shabyty shalqyp turǵan sáti beınelengen.
"Dırıjer etip turǵanda Nurǵısa erekshe rýhtanyp ketetin. Músinde sol rýh qatty baıqalady. Eskertkish kóńilimnen shyqty",-dedi Nurǵısa Tilendıevanyń jary Darıǵa Tilendıeva.
Ashylý saltanatynda qala ákimi uly sazgerdiń jan-jaqty sheberligin atap ótip: "Nurǵısa Tilendıev qazaq kúıleri men ánderiniń damýyna úles qosqan óner ıesi ǵana emes, ol ónerdiń álemdik teorııasyn jáne tarıhyn tereń zerttegen tulǵa. Sondyqtan da, onyń shyǵarmalarynda ulttyq áýender men klassıkalyq mýzyka jaqsy úılesim tapqan. Onyń mýzykalyq týyndylaryna kóptegen sheteldik mamandar tańdaı qaǵatyn. Nurǵısa Tilendıevtiń muralaryn sózben ólshep, sanaý múmkin emes. Ol qazaq mýzykasyn jańa, joǵarǵy-bıik deńgeıge kóterdi",-dedi.
Daryndy sazger Nurǵısa Tilendıev (1925-1998)- qazaqtyń mýzykalyq mádenıetine kompozıtor, dırıjer, oryndaýshy retinde óshpes iz qaldyrǵan sýretker. Ol 500-den astam mýyzykalyq tól týyndylardyń avtory.
