Almatyda Nurǵalı Orazdyń «Adasqan juldyzdar» degen jańa dramasynyń tusaýkeseri ótti
ALMATY. Maýsymnyń 26-sy. QazAqparat /Erlik Erjanuly/ - Keshe Almatydaǵy Ǵabıt Músirepov atyndaǵy memlekettik akademııalyq balalar men jasóspirimder teatrynda «Adasqan juldyzdar» degen jańa qoıylymnyń tusaýy kesildi,
dep habarlaıdy QazAqparat.
Dramanyń avtory - Nurǵalı Oraz. Qoıýshy-rejısseri QR eńbek sińirgen qaıratkeri Baltabaı Seıitmamytuly, sýretshisi QR mádenıet qaıratkeri Serikqan Omarov.
«Bul óte bir sátti qoıylǵan qoıylym boldy. Óıtkeni dramatýrgııada biz kóbinese ótken shaqty kóbirek aıtamyz. Nurǵalı Orazdyń búgingi «Adasqan juldyzdar» dramasy búgingi zamannyń qoıylymy. Men osy zamannyń muńy men jyryn jáne oqıǵalaryn aıta alatyn sýretkerdi ǵana naǵyz sýretker, naǵyz jazýshy, naǵyz dramatýrg dep sanaımyn», deıdi aqyn Bolat Sharahymbaı. Onda basty keıipkerlerdi Erbol Sadyrbaev (rejısser), Áset Imanǵalıev (akter), Qadyrǵazy Qýandyqov (egde jastaǵy akter), Sánııa Erzatqyzy (kelinshek) jáne taǵy basqalar somdap shyqty. Bul shyǵarma kezekti qoıylymdardyń birinde qaıyrshy rólin oınaǵannan keıin ómiri kúrt ózgergen teatr akteriniń taǵdyry týraly. Bas keıipker ómir shyndyǵymen betpe-bet kelip, ádiletsizdikke jany kúıgen kezde teatrdy tastap, ómirdegi óz rólin oınaý týraly sheshimge keledi.
