Almatyda Nur Otan partııasynyń belsendileri gýmanıtarlyq kómekter kórsetýde

ALMATY. QazAqparat - Almatyda kásipkerler, metsenattar, máslıhat depýtattary qatarynan Nur Otan partııasynyń belsendileri áskerı qyzmetshilerge, patrýldik-kúzetshilerge, metropolıten men qalanyń kommýnaldyq qyzmetkerlerine gýmanıtarlyq kómek kórsetýdi jalǵastyrýda. Bul týraly partııanyń qalalyq fılıaly málimdedi, dep habarlaıdy QazAqparat tilshisi.

Jas Otan jastar qanaty eriktileriniń kúshimen eki myńnan astam áskerı qyzmetshi, quqyq qorǵaý organdary men kommýnaldyq jumys qyzmetkerleri osy jyldyń 6 qańtarynan bastap úzdiksiz ystyq tamaqpen qamtamasyz etildi. Gýmanıtarlyq kómekpen Almatynyń on joǵary oqý orny men kolledjderiniń 2 myń stýdenti qamtyldy.

Nur Otan partııasy depýtattyq fraktsııasynyń músheleri men partııanyń Almaty qalalyq fılıalynyń belsendileri, sondaı-aq, Praımerız qatysýshylary Aıda Bekmanova, Baqtııar Blaev, Baqytbek Jumabaev jáne Talǵat Tileshev jáne basqalary aýdandyq ákimdiktermen jáne «Rahym» áleýmettik úıimen birlesip, turmysy tómen jáne muqtaj almatylyqtarǵa birinshi kezekte qajetti azyq-túlikpen jáne ystyq tamaqpen qamtamasyz etip, kómek kórsetti.

«KazFerroStal» JShS janyndaǵy bastaýysh partııa uıymdarynyń tóraǵalary qaıyrymdylyq muqtajdyqtaryna jáne qalany abattandyrýdy qamtamasyz etýge 4,5 mln teńge, al «AZMK» JShS janyndaǵy bastaýysh partııa uıymyna 6 mln teńge bóldi. Áýezov aýdanynda az qamtylǵan turǵyndarǵa 6,5 mln teńgege, Naýryzbaı jáne Alataý aýdandarynda 5,5 mln teńgege kómek kórsetildi.

Osy saǵatta Almaty qalasynyń barlyq aýdandaryna shamamen 30 mln teńge kóleminde kómek kórsetildi.

Partııanyń qalalyq fılıaly tóraǵasynyń birinshi orynbasary Meıirjan Otynshıevtiń aıtýynsha, almatylyq partııalyqtar ózara is-qımyl men alǵashqy kómek kórsetýdi jalǵastyrady. Sonymen qatar, Nur Otan partııasy qalalyq fılıaly janynda jedel jeli telefondary jumys isteıdi, 279-78-00, [phone]