Almatyda Nur Otan partııasy onlaın rejımde qoǵamdyq qabyldaý ótkizdi

ALMATY. QazAqparat- Baqytjan Saǵyntaev «Nur Otan» partııasynyń qalalyq fılıalyna júgingen azamattarmen qabyldaý ótkizdi. Onlaın formatta ótken qabyldaýda almatylyqtar abattandyrýǵa, ekologııaǵa, erekshe balalardy qoldaýǵa qatysty túrli máselelerdi kóterdi, dep habarlaıdy QazAqparat tilshisi.

«Merkýr Grad» turǵyn úı kesheniniń turǵyndary Nur Otan partııasy qalalyq fılıalynyń qabyldaýyna júgindi. Olar partııanyń Almaty qalalyq fılıalynyń tóraǵasy, Almaty ákimi Baqytjan Saǵyntaevqa qurylys júrgizýshiniń kinásinen úıleriniń gazǵa qosylmaǵanyn aıtyp shaǵymdandy.

Osyǵan oraı, Baqytjan Saǵyntaevtyń tapsyrmasy boıynsha máseleniń sheshilýi jedeldetiledi – jaqyn arada olardyń úıleri gazǵa qosylady, al aýdan ákimi aýmaqty abattandyrý máselesin sheshýmen aınalysady.

«Kóktóbe shaǵyn aýdany turǵyndarynyń ótinishi boıynsha qazirgi kezde jeke aýmaqta ornalasqan saıabaqty abattandyrý múmkindigi qarastyrylady. Sondaı-aq, osy shaǵyn aýdanda sýdan burý jelisin salý jáne elektr jelilerin modernızatsııalaý máselesi zerdelenedi.

Naýryzbaı aýdanyndaǵy Beǵalıev kóshesi tuǵyndarynyń ótinishi boıynsha salynyp jatqan Abaı dańǵylyna qaraı shyǵatyn kóshe tuıyqtalady.

Baqytjan Saǵyntaev «Jasyl ekonomıka» basqarmasyna tıisti qyzmettermen birge ekobelsendi Tımýr Eleýsizovtiń ekologııalyq máseleler boıynsha komıssııa qurý týraly usynysyn, sondaı-aq osy saladaǵy sheshimderdi ázirleıtin ınnovatsııalyq habty pysyqtaýdy tapsyrdy.

Tamaq zaýytyna irgeles ornalasqan Anosov kóshesi turǵyndarynyń ótinishi jan-jaqty qaralady, sanıtarlyq normalardyń saqtalýy tekseriledi.

Aýtızmi jáne damýynda basqa da aýytqýshylyqtary bar balalarǵa kómek kórsetý jónindegi «Lých sveta» qorynyń dırektory L. Baıramova izgi ispen, aqyl-esinde kemistigi bar kámeletke tolmaǵandardy áleýmettendirýmen aınalysýda. Onyń jumysyn odan ári damytý úshin jaıly oryn jáne qaramaǵyndaǵylardy tasymaldaý úshin kólik suraǵan ótinishi qoldaý tabatyn boldy.