Almatyda «Nur Otan» partııasy qalalyq máslıhatqa saılaý boıynsha praımerız ótkizdi (FOTO)
ALMATY. QazAqparat - Búgin Almatyda Qazaq memlekettik qyzdar pedagogıkalyq ýnıversıtetinde ótken praımerız barysynda 6-shy saılaý okrýgy boıynsha «Nur Otan» partııasy atynan qalalyq máslıhatqa úmitker saılandy.
«Búgin biz 6-shy saılaý okrýgy boıynsha kezekti praımerız, ıaǵnı aldyn ala saılaý ótkizdik. Ondaǵy maqsatymyz - negizgi jáne rezervtik úmitkerdi anyqtaý. Búgingi praımerızge 3000 myńnan astam partııa músheleri atynan 34 bastapqy partııa uıymdarynyń saılaýshylary kelip otyr. Eń kóp daýys alǵan azamattar qalalyq konferentsııa barysynda «Nur Otan» partııasy atynan qalalyq máslıhattyń saılaýyna úmitker retinde usynylady», - dedi «Nur Otan» partııasy Almaly aýdandyq fılıaly tóraǵasynyń orynbasary Naılıa Ordabaeva.
Saılaýshylar jıynynyń hatshysy bolyp, «Nur Otan» partııasynyń aýdandyq fılıalynyń keńesshisi Ásel Moldabaeva taǵaıyndaldy.
Aldyn ala irikteý saılaýyna eki úmitker usynyldy. Olar: Qazaq memlekettik qyzdar pedagogıkalyq ýnıversıtetiniń rektory Dınar Núketaeva jáne qalalyq kardıologııalyq Ortalyqtyń dáriger-otashysy Arman Sadyqov.
Saılaý aldynda úmitkerler men olardyń resmı ókilderi sóz sóıledi. Úmitkerler óz baıandamalarynda qala ekologııasyn jaqsartý, kólik keptilisin joıý, páter ıeleri kooperatıvteriniń máselesin sheshý, joǵary oqý oryndary men medıtsınalyq mekemelerdiń jumystaryn jolǵa qoıý boıynsha óz usynystaryn ortaǵa saldy.
Sonymen, jasyryn daýys berý barysynda daýystardyń 66 paıyzy D. Núketaevaǵa berildi.
Aıta ketelik, Almaty qalasynyń Almaly aýdanynda «Nur Otan» partııasyna múshe - 10 768 adam bar. 
